Pronën e njëjtë ua shiti dy personave për 250 mijë euro, arrestohet pas 6 muajsh i dyshuari për mashtrim

Marrëveshjet për blerje të pronave e objekteve të ndryshme në vendin tonë jo rrallëherë dalin të jenë vetëm mashtrime, me qëllim përfitimin e shumave të majme të parave. Qytetarë të shumtë shpesh bien pre e mashtruesve, të cilët përmes paraqitjes së fakteve të rreme arrijnë t’i mashtrojnë, duke përfituar kundërligjshëm. Një rast i tillë që dyshohet të ketë ndodhur para tri vitesh, është denoncuar vitin e kaluar dhe tek sot i dyshuari është arrestuar nga Policia, raporton Gazeta Sinjali.

Burimet nga Prokuroria kanë bërë me dije se bëhet fjalë për A.J., 63-vjeçar, i cili dyshohet se në muajin nëntor të vitit 2020 kishte shitur një pronë te viktima, ndërtesë kjo të cilën më pas e kishte shitur pas një viti te një person tjetër.

Sipas informacioneve që ka Sinjali, i dyshuari ishte marrë vesh me viktimën për shitjen e pronës në vlerë prej 100 mijë euro, por të njëjtën pronë pas një viti e ka shitur te një person tjetër, në vlerë prej 150 mijë euro.

Vitin e kaluar, viktima vendosi të kërkojë ndihmën e Policisë, pasi marrëveshja të cilën e kishte lidhur me të dyshuarin nuk po zbatohej dhe dyshonte se ishte mashtruar.

Pas disa muajsh hetime, Policia ka arritur që gjatë ditës së sotme ta arrestojë sot personin e dyshuar, i cili është shoqëruar në stacion policor për intervistim, ku ka dhënë deklaratën e tij për veprën me të cilën ngarkohet.

Pas përfundimit të procedurave, me urdhër të Prokurorit të Shtetit i dyshuari është dërguar në mbajtje dhe rasti është iniciuar ‘Mashtrim’, teksa veprimet tjera do të ndërmerren brenda afatit ligjor.