Policia bastis shtëpitë dhe bizneset e “Kobrës” pas vrasjes së 31-vjeçarit: Nga fishekët, te granatat, çfarë u gjet

Dy ditë pas vrasjes së 31-vjeçarit Visart Cengu në Prizren, policia e Kosovës ka bastisur lokalin “Kobra City” ku ndodhi ngjarja si dhe banesën e një prej personave të përfshirë në konfliktin ku u humi jetën i riu.

Sipas mediave kosovare, në lokalin “Kobra City” janë gjetur disa materiale, të cilat nuk përcaktohen, që mund të përdoren si prova për vrasjen e 31-vjeçarit nga Kukësi.

Ndërsa në banesën e një prej personave të përfshirë në ngjarjen e rëndë, janë gjetur disa fishekë dhe një granatë dore.

“Sot gjatë ditës Drejtoria e Krimeve të Rënda në bashkëpunim me Drejtorinë Rajonale të Policisë në Prizren kanë vazhduar bastisjet në tri lokacione, derisa është bastis edhe lokali “Kobra City”. Gjatë këtyre bastisjeve janë sekuestruar disa gjëra, që mund të përdoren si prova”, tha zëdhënësi i policisë Shaqir Bytyqi për Gazetën Express.

Vrasja e 31-vjeçarit Visart Cengu ndodhi në orët e para të mëngjesit më 3 janar. I shoqëruar nga një person tjetër, ata shkuan në lokalin “Kobra City” për të pirë.

Sipas raportimeve, dyshohet se shkak i konfliktit është bërë fatura e lokalit. Pasi u konfliktuan në lokal me Dibran Hoxhajn, të rinjtë u drejtuan tek makina e tyre./javanews/