Hakmarrje për shokun? Del fotoja e ekzekutorit të Edmond Papës, shok i ngushtë me Aleksandër Sadikajn

30-vjeçari në foto është Albano Velo, i arrestuar nga policia si autor i vrasjes së Edmond Papës më 16 dhjetor në një bar në zonën e Selitës në Tiranë.

Në bashkëpunim me një 44-vjeçar, Velo ndoqi për disa ditë me radhë biznesmenin, derisa e qëlloi Papa disa plumba, duke e lënë të vdekur.

Edmond Papa ishte me precedentë të mëparshëm penal, në të cilën do të shtrihen hetimet, por kjo nuk është e vetmja pistë.

Gazetarja Dorjana Bezat mëson së Velo ishte shoku i ngushtë i Aleksandër Sadikjat, 27-vjeçarit i cili u ekzekutua me lëndë plasëse të vendosur poshtë makinës së tij, një ndër vrasjet më të bujshme të vitit të shkuar që mbetet ende enigmë.

Poshtë mjetit të Sadikjat ishin vendosur rreth 500 gram C4, që shpërtheu në afërsi të TEG-ut më 11 qershor. Sadikaj mbeti i plagosur rëndë, doli vetë nga mjeti por nga plagët e rënda humbi jetën në spital.

Sadikaj ishte emër i njohur për drejtësinë, por i dyshimtë mbetet takimi që pati në Sarandë me Edmond Papën dy ditë para se të vritej me eksploziv, që dyshohet se pati lidhje me ngjarjen.

Të dy ata janë ekzekutuar, ndërsa do të jetë dëshmia e Albano Velos që do të hedhë dritë mbi ngjarjen./ Top Channel