Burri merr peng dhe dhunon gruan në Tiranë, nga Janari 2500 gra me urdhër mbrojtje në Shqipëri

Nga Xhensila Kodra

Amarildo Shabani është agresori i radhës i arrestuar nga policia pasi dhunoi bashkëshorten edhe pse ajo ishte me urdhër mbrojtjeje prej 6 muajsh.

Çifti i bashkëshortëve jetonin në banesa të ndryshme. Mesditën e djeshme, 33 vjeçari shkoi në vendin e saj të punës, në një farmaci në Tiranë.

Pasi e mori me forcë prej andej dhe e futi në makinë, e çoi në një lokal dhe e dhunoi.

Policia u njoftua nga kolegët e gruas, të cilët bënë edhe arrestimin në flagrancë të burrit dhunues, për tre vepra penale “Heqja e paligjshme e lirisë”, “Dhuna në familje” dhe “Veprime në kundërshtim me vendimin e gjykatës”.

33 vjeçari ka pretenduar se po i krkronte falje bashkëshortes dhe se donte të rikthehej me të.

Por, dëshmia e saj ka hedhur poshtë pretendimin e të riut duke treguar për hetuesit se Shabani kishte kohë që shfaqte shenja xhelozie dhe nuk e lejonte atë të dilte nga shtëpia e të punonte.

Fenomeni i dhunës në familje, e sidomos kur gratë kanë qenë me urdhër mbrojtje janë rritur ndjeshëm.

Si pasojë e dhunës në familje, afro 2 500 gra janë pajisur me urdhër mbrojtje nga gjykata që prej fillimit të vitit.
E megjithatë janë të shumta rastet ku bashkëshortët e kanë shkelur këtë urdhër.

Të dhënat e policisë tregojnë se nga janari e deri më tani, janë arrestuar 150 persona që duke shkelur vendimin e gjykatës, kanë dhunuar sërish gratë e tyre të pajisura më herët me urdhër mbrojtje./abcnews.al/