Shkrimtari e publicisti shqiptar, Kim Mehmeti ka reaguar pas zhvillimeve të fundit në Kosovës, respektivisht kritikave që po drejtohen në adresë të kryeministrit Albin Kurti.
Në një reagim të shkruar në rrjetin social, Mehmeti në një formë ka shprehur habinë me kërkesat e opizitarëve që kanë ndaj Qeverisë së Kosovës për gjendjen e krijuar së fundi.
“Jo vetëm të huajt, por edhe shumë opozitarë, i kërkojnë Qeverisë së Kosovës të jetë sa më e kujdesshme e përafruese ndaj Serbisë. Kështu që ke përshtypjen se Kryeministri i Kosovës, e jo Vuçiqi, ka qenë hartues i luftërave të fundit që e përgjakën dhe e mbuluan me varreza masive Ballkanin. Dhe përderisa një pjesë e Evropës ‘humane’ hapur mbanë anën e Serbisë, disa opozitarë shqiptarë me padurim presin dështimin e qeverisë së VV, me çka do mbuloheshin lëshimet që ata ua bënin kriminelëve serbë në veri si dhe Beogradit zyrtar”, ka shkruar shkrimtari Mehmeti, raporton KosovaNews
Sidoqoftë, Mehmeti thekson se Albin Kurti sot nuk ka përballë vetes vetëm luftënxitësit që e drejtojnë Serbinë, por edhe ‘paqendërtuesit’ shqiptarë që tani përballen me të shkuarën e tyre të turpshme, gjatë së cilës, nuk ndërtonin shtet, por vila e shtëpi të shtrenjta për vetveten.
“Siç duhet nënvizuar se Kryeministri i Kosovës sot merret me pastrimin e ’plehut’ që lanë pas vetes burrështetasit e mëparshëm të korruptuar të vendit të cilët, në mos më shumë, duhej njëherë e përgjithmonë të qartësonin nëse Kosova është shtet i pavarur me kryeqendër Prishtinën, apo një protektorat i Serbisë”:, është shprehur ai.
Andaj, siç është shprehur Mehmeti “të vjen për të vjellë kur sheh si edhe në këto rrethana, ka politikanë e ‘mendjehapur’ shqiptarë që i kritikojnë veprimet e Kurtit, e të cilët dekada me radhë nuk vepruan, por duke iu nënshtruar Beogradit, vetëm përfituan.
Sipas Mehmetit, këta persona për ta mbuluar të shkuarën e tyre poshtëruese, thuajse më shumë e dëshirojnë dështimin e Albin Kurtit, se sa demaskimin e Beogradit luftëndjellës.
“Andaj duhet thënë hapur: nëse Beogradi ka vendosur të mbetet atë që ka qenë – kryeqendra e luftërave të reja ndëretnike – atëherë, sado paqësorë qofshim, ne s’kemi si e pengojmë këtë. Dhe kjo neve mund të na përballë vetëm me dy zgjidhje: o ta braktisim Kurtin e t’i përkulemi Vuçiqit, ose të dëshmojmë se meritojmë atdhe e shtet!”, ka thënë shkrimtari e publicisti Mehmeti./KosovaNews
