Presidenti ukrainas, Volodymyr Zelensky, u takua të martën në Kiev me drejtorin e Agjencisë Qendrore të Inteligjencës së SHBA-së, William Burns.
Ky takim vjen teksa Burns është duke qëndruar në Ukrainë për të diskutuar luftën me Rusinë, shkruan Skynews, transmeton Klankosova.tv.
Të hënën, Burns u takua me shefin e spiunazhit të presidentit rus Vladimir Putin në Turqi për kontaktin e parë të njohur të nivelit të lartë, kokë më kokë SHBA-Rusi që nga pushtimi.
“Ne patëm një takim me të… (ne) biseduam për të gjitha çështjet që janë të rëndësishme për Ukrainën”, tha Zelensky në një konferencë për shtyp në televizion.
Zelensky tha se kreu i CIA-s kishte kaluar kohë në një strehë për bomba përpara se të takoheshin bashkë.
Në Uashington, një zyrtar amerikan tha se Burns kishte udhëtuar në Kiev për të takuar homologët e inteligjencës ukrainase dhe Zelenskyn pas takimit të tij në Ankara.
