Dhimbja e Ronaldos: Flas çdo ditë me djalin tim, më ndihmon …

Cristiano Ronaldo, në një fragment të intervistës së tij me Piers Morgan në Talk TV, foli me zemër të hapur për një nga momentet më të këqija të jetës së tij: vdekjen e një prej binjakëve që ai dhe partnerja e tij, Georgina Rodríguez, prisnin në prill. CR7 rrëfen se nuk ka ditur të reagojë dhe se nuk ka mundur të gjejë arsye pse i ka ndodhur kjo tragjedi.

“Ka qenë ndoshta momenti më i vështirë që kam pasur në jetën time që kur më ka vdekur babai. Kur ke një fëmijë, pret që gjithçka të jetë normale, por e ke atë problem… është e vështirë. Nuk e kuptonim pse po na ndodhte kjo. Ka qenë momenti më i vështirë që kemi vuajtur, sidomos për Georginën ishte shumë e vështirë.

Për ndjenjat e përziera, kur vuante vdekjen e një djali dhe në të njëjtën kohë përjetonte lindjen e vajzës, Cristiano Ronaldo shpjegoi:

“Përpiqem t’ua shpjegoj familjarëve dhe miqve të mi më të ngushtë se kurrë nuk jam ndjer i lumtur dhe i trishtuar në të njëjtën kohë. Është e vështirë për ta shpjeguar. Nuk e di nëse do të qash apo do të buzëqeshësh, sepse është diçka për të cilën nuk di si të reagosh, nuk di çfarë të bësh”.

Cristiano tregoi se u përlot në momentin kur ai dhe Georgina Rodríguez u kthyen në shtëpi pas lindjes së njërit prej binjakëve: “Gio erdhi në shtëpi dhe fëmijët filluan të thonë, ku është foshnja tjetër, ku është foshnja tjetër?”.

CR7 zbuloi se mbante hirin e djalit të tij me atë të babait, i cili vdiq në vitin 2005, në një kishë të krijuar në bodrumin e shtëpisë së tij:

“Flas me ta gjatë gjithë kohës dhe ata janë pranë meje. Më ndihmon të jem njeri më i mirë, baba më i mirë. Jam krenar për këtë… mesazhin që më dërgojnë, veçanërisht djali im.”