Organizata Jo-qeveritare “Plan” që merret me “përkrahjen e bizneseve”, ka marrë 14 mijë euro subvencione nga Komuna e Prizrenit “për dinamizmin e jetës kulturore” në këtë qytet, shkruan KosovaNews.
Drejtor ekzekutiv i kësaj organizate, del të jetë Arben Shala, anëtar i komisionit në përzgjedhjen e mësimdhënësve në Komunën e Prizrenit, të cilit gjatë ditëve të kaluara në media iu publikua një audio-incizim, ku vet Shala, tregon se si ishte marrë vesh me kryetarin e Prizrenit Shaqir Totaj dhe PDK-në, për përzgjedhjen e drejtoreshës së gjimnazit “Gjon Buzuku” në Prizren.
E për këtë, Shala duket se është shpërblyer nga kryetari Shaqir Totaj duke e marrë shifrën rekord prej 14 mijë eurosh, subvencione nga Komuna e Prizrenit.
Ajo që mund të cilësohet më skandaloze, është se Arben Shala, me organizatën e tij, del të jetë përfituesi më i madh i subvencioneve nga Komuna e Prizrenit për këtë vit edhe pse kishte vetëm pak muaj që e kishte themeluar OJQ-në Plan.
Në listën e publikuar nga Komuna, nga subvencionet kanë përfituar gjithsej 39 organizata me projekte të ndryshme me çmime mesatare që sillen rreth 3-4 mijë euro edhe pse këto OJQ operojnë me vite të tëra në rajonin e Prizrenit.
Për më tepër, sipas sistemit elektronik të organizatave jo-qeveritare, misioni i OJQ, “Plan” të cilën e udhëheq Arben Shala, është t’i “ndihmojë ndërmarrësit e rinj për avancim profesional”, kurse subvencioni 14 mijë eurosh që e ka pranuar nga Komuna e Prizrenit nuk ka të bëjë fare me misionin e organizatës së regjistruar zyrtarisht.
Në vendimin përfundimtar për subvencionimin e OJQ-ve dhe individëve, organizata “Plan”, është subvencionuar me 14 mijë euro për “Dinamizmin e Jetës Kulturore në Prizren”.
I kontaktuar nga KosovaNews, lidhur me rastin, Shala e ka pranuar se OJQ që ai udhëheq është i regjistruar për përkrahjen e bizneseve por, sipas tij së shpejti do të fillojnë edhe me aktivitete Kulturore.
“Po është e vërtetë që jemi të regjistruar si organizatë që merret me përkrahjen e ndërmarrësve të rijnë, por së shpejti do të fillojmë të merremi edhe me aktivitetet kulturore. Ajo që po e thoni ju, po është e vërtetë, misioni zyrtar i regjistruar i organizatës është përkrahja e bizneseve dhe ndërmarrësve të rinj.”, ka thënë Shala për KosovaNews.
Kjo organizatë që nuk ka as një vit provojë në aktivitetet e saja, madje as ëeb faqja e saj nuk është themeluar ende, ka arritur të subvencionohet me 14 pmijë euro nga Drejtoria e Kulturës së Komunës së Prizrenit të udhëhequr nga Shaqir Totaj i PDK-së.
Data e regjistrimit zyrtar i OJQ “Plan”, në sistemin elektronik të organizatave jo-qeveritare, figuron të jetë 02 mars 2022 dhe ende nuk posedon asnjë web faqe që njofton lidhur me aktivitetet e saj.
