Varhelyi takohet me anëtarët e institucioneve të Vettingut (FOTOT)

TIRANË– Anëtarët e organeve të rivlerësimit kalimtar për gjyqtarët dhe prokurorët në Republikën e Shqipërisë zhvilluan ditën e sotme një takim me Komisionerin për Fqinjësinë dhe Zgjerimin në Komisionin Evropian, Oliver Varhelyi. Në takim u diskutua mbi ecurinë e procesit të rivlerësimit të gjyqtarëve dhe prokurorëve në Republikën e Shqipërisë, rezultatet e deritanishme dhe sfidat në vazhdim. Kryetarja e Komisionit të Pavarur të Kualifikimit (KPK), Pamela Qirko i shprehu Komisionerit Varhelyi falënderimet e Komisionit për mbështetjen e pakursyer dhe të vazhdueshme të Komisionit Evropian për reformën në drejtësi dhe procesin e vettingut, ndërsa nënvizoi se KPK do të vijojë me rivlerësimin e gjyqtarëve dhe prokurorëve deri në përmbyllje të procesit, me paanshmëri, integritet dhe profesionalizëm pavarsisht vështirësive.

Komisioneri e cilësoi realizimin e procesit të rivlerësimit një arritje themelore për të ardhmen e vendit, si dhe shprehu vlerësime për punën e deritanishme të organeve të vetingut. Njëkohësisht, Komisioneri u shpreh se sulmet ndaj anëtareve të organeve të rivlerësimit dhe familjarëve të tyre duhet të ndalojnë. Ai inkurajoi anëtarët e organeve të rivlerësimit të vijojnë me procesin bazuar mbi themelet e forta të punës së bërë, si edhe garantoi mbështetjen e plotë të Komisionit Evropian në procesin e rivlerësimit të gjyqtarëve dhe prokurorëve në Republikën e Shqipërisë.

Komisioneri Varhelyi do të zhvillojë një konferencë për mediat në orën 14:30 me kryeministrin Edi Rama. Sot ai ndodhet në Tiranë në kuadër të një vizite zyrtare.

(A.B)/Dosja.a

The post Varhelyi takohet me anëtarët e institucioneve të Vettingut (FOTOT) appeared first on Dosja AL.