Në Qendrën Korrektuese në Dubravë parandalohet futja e 51 qeseve me substancë narkotike

Sot, rreth orës 14:20, në Qendrën Korrektuese në Dubravë, gjatë një patrullimi të bërë nga Njësiti Intervenues, jashtë perimetrit të murit rrethues, është gjetur një qese e mbushur me substancë të dyshuar narkotike.

Pas hapjes së qeses së dyshuar, brenda saj ishin vendosur 51 qese në sasi të vogla, të mbështjella veç e veç, të cilat dyshohet se janë substancë narkotike, përcjell klankosova.tv.

”Qesja me sasi të dyshuar narkotike dyshohet se është hedhur mbi muri nga pjesa e jashtme, ndërsa vlen të theksohet se kontrabanda e gjetur është parandaluar të futet brenda zonës së banuar. Lidhur me rastin është njoftuar Policia e Kosovës, e cila ka bërë konfiskimin e substancës se dyshuar narkotike dhe ka filluar hetimet se si ka ardhur deri te tentimi i futjes së kontrabandës brenda perimetrit të qendrës”, kanë konfirmuar për klankosova.tv nga Shërbimi Korrektues i Kosovës.

Tutje thuhet se Shërbimi Korrektues i Kosovës mbetet i përkushtuar në luftimin kontrabandës brenda institucioneve korrektuese dhe asnjëherë nuk do të qëndrojë duarkryq përballë dukurive negative të cilat rrezikojnë rendin dhe sigurinë e saj.