Nafta ulet sërish/ Sot, pritet protestë masive para kryeministrisë

Për të dytën ditë radhazi, çmimet e naftës në vend janë ulur. Këtë të Shtunë çmimet kanë rënë deri në 10 lekë për Litër, duke u shitur në pikat e furnizimit të karburanteve me 215 – 220 Lekë për Litër.

Ulja e çmimit të naftës vjen pas tre ditëve protesta në disa qytete në vend, duke konfirmuar dyshimet se më shumë se çmimi i bursave, rritja e çmimit në vend është bërë nga spekulantë.

Pavarësisht protestave, qeveria nuk ka pranuar heqjen e taksave mbi naftën, që llogariten rreth 100 lekë për Litër, por ka marrë përsipër vendosjen e çmimit në bashkëpunim me tregtarët.

Edi Rama njoftoi dje ngritjen e një Bordit Kombëtar të Administrimit të Karburantit – një ent me përfaqësues të bizneseve të tregtimit të naftës dhe qeverisë – që siç shpjegoi kryeministri, do të bëjë transparencë dhe do të vendosë një çmim të unifikuar në treg. Në një reagim këtë të Shtunë, ai shkroi në FB “çmimet do të kalojnë në filtrin e transparencës dhe marzhi i fitimit të kompanive do të ngrijë, për të mos lejuar asnjë abuzim në kurriz të qytetarëve”.

Ekspertë të fushës megjithatë, janë treguar skeptikë për nismën.

Parashikimet janë të zymta edhe për të ardhmen, me çmimet në vend që vijojnë të rriten, nga produktet ushqimore e deri te mallrat e tjerë. Ndërkohë që këtë të Shtunë në orën 10:00 një protestë masivë pritet para kryeministrisë.

/BN/