FOTO+ VIDEO/ Detaje nga arrestimi i Nuredin Dumanit, i njohur si “njeriu hije”. Momentet kur kapet

Forcat speciale RENEA arritën të arrestojnë mbrëmjen e sotme në lagjen Apollonia në qytetin e Fierit, Nuredin Dumanin, i njohur ndryshe si “njeriu hije”.

Dumani u arrestua disa orë pas një ngjarjeje të ndodhur në Elbasan, ku ka pasur shkëmbime zjarri mes dy automjeteve, dhe mendohet se ai është i përfshirë, ndërsa në automjetin tjetër ndodhej Talo Çela.

Për arrestimin e Dumanit RENEA ka përdorur edhe dronët, ndërsa informacionet janv siguruar në rrugë operative mbi vendndodhjen e tij.

Në momentin e arrestimit Dumani ka qenë i armatosur, por nuk ka bërë rezistencë, ndërsa dyshohet se ai ka qenë edhe i plagosur. Nga të dhënat e para mësohet se ai ka pasur një plagë me armë zjarri, ndoshta nga përplasja e ndodhur në orët e pasdites në Elbasan.

Nga të dhënat mësohet se Dumani strehohej në një apartament në një pallat 9 katësh, rreth 1 km larg nga urgjenca spitalore e Fierit.

Nuk dihet nëse ai më parë ka marrë mjekimin në Urgjencë apo jo, por policia e ka arrestuar në një nga apartamentet e pallatit, që më parë u rrethua nga RENEA dhe FNSH.

Nuredin Dumani ishte shpallur në kërkim për vrasjen e vëllait të Talo Çelës, Bujar Çela, ngjarje e ndodhur në vitin 2020 në Elbasan. Prokuroria thotë se 37-vjeçari ka qenë pjesë e grupit që bëri ekzekutimin e vëllait të Talo Çelës.