Basha mbledh me urgjencë grupin parlamentar në selinë e PD-së, ja çfarë do të diskutohet… 

Kryetari i Partisë Demokratike, Lulzim Basha mbledh grupin parlamentare ne orën 20:00.

Ne fokus të mbledhjes do të jenë komisionet për Reformën Territoriale dhe Reformën Zgjedhore. Basha gjatë njoftimit u ka kërkuar deputetëve që janë të angazhuar në fushatë që mbledhjet respektove të shtabit mund t’i zhvillojnë më herë në mënyrë që të jenë prezent të gjithë në mbledhjen e grupit parlamentar në selinë blu.

Në këmbim të këtyre dy reformave të kërkuara nga opozita, PD votoi në këmbim zgjatjen e afateve të Vettingut. Vlen të theksojmë që të enjten e javës së kaluar u miratua me 119 vota pro dhe asnjë kundër ngritja e një komisioni për Reformën Zgjedhore. Gjithashtu është miratuar edhe ngritja e një komisioni për Reformën Territoriale, me 120 vota pro dhe asnjë kundër. Kujtojmë që deputetët mbështetës të ish kryeministrit Sali Berisha kishin deklaruar votën e tyre kundër zgjatjes së mandatit për organet e Vettingut deri në vitin 2024.

Gjithashtu janë zbardhur emrat që ka propozuar Partia Socialiste për të qenë pjesë e Komisionit për Reformën Zgjedhore. Mësohet se deputetët që janë propozuar: Toni Gogu, Ermonela Felaj, Klotilda Bushka, Blerina Gjylameti, Klevis Xhoxhi, Blendi Klosi, Arben Pëllumbi ndërkohë që bashkëkryetar do të jetë Damian Gjiknuri.

Ndërsa në krahun tjetër PD-ja deri tani nuk ka publikuar asnjë emër të anëtarëve për Reformën Zgjedhore.