Veliaj tjetër disfatë, Korça propozon Dukën për kryetar të FSHF-së

Pas Tiranës dhe Fierit edhe Korça rrëzon Erion Veliajn. Asambleja e Shoqatës Rajonale të Futbollit ka zgjedhur të përfaqësohet në zgjedhjet për Presidentin e Federatës me Ilirjan Përmetin dhe Roland Shkëlqimin, zyrtarë të futbollit të klubit të Skënderbeut.

“Në këto punime morën pjesë delegatët e 5 anëtarëve të kësaj shoqate, nga 8 që janë në total. Këto 5 anëtarë u përfaqësuan në këtë mbledhje nga 7 delegatë. SHRF Korçë konstatoi me shqetësim se për zhvillimin e këtyre punimeve, përfaqësuesi i njërit prej dy delegatëve të KF Pogradeci nuk u lejua nga kryetari i Bashkisë Pogradec të merrte pjesë në këtë Asamble. Anëtarësia e shoqatës vendosi të propozojë emrin e Armand Dukës si kandidat për President të Federatës Shqiptare të Futbollit dhe emrin e Arben Dervishaj si kandidat për anëtar të Komitetit Ekzekutiv të FSHF-së. Shoqata Rajonale e Futbollit Korçë, në këtë mbledhje vendosi të trajtojë edhe propozimin e disa anëtarëve për zgjedhjen e përfaqësuesve të SHRF Korçë në Asamblenë e Përgjithshme të FSHF-së. Në përfundim të votimit delegatët e SHRF Korçë zgjodhën me unanimitet të plotë, kryetarin në mandat, Ilirjan Përmeti dhe Roland Shkëlqimin për t’i përfaqësuar në Asamblenë e Përgjithshme Zgjedhore të FSHF-së”, thuhet në njoftimin e Federatës.

Votimet u paraprinë me tensione të mëdha, pasi ministri Niko Peleshi së bashku me kryetarin e Bashkisë Korçë Sotiraq Filo, si dhe ata të Devollit, Maliqit dhe Pogradecit kanë zhvilluar takime të posaçme me anëtarët e shoqatave me të drejtë vote.

Madje duke iu bashkuar nismës së Veliajt, u kanë kërkuar mbështetësve të firmosin një shkresë ku kërkojnë transparencë dhe shfuqizimin e vendimeve të mëparshme.

Pavarësisht tensioneve, vetëm 6 prej tyre kanë nënshkruar deklaratën në prani të noterëve.

Po ashtu edhe në Gjirokastër ministrja Mirela Kumbaro duket se është në aksion.

Mësohet se ajo ka  zhvilluar takime me anëtarët e shoqatës së futbollit të qytetit të gurtë për të kërkuar votën kundër emrave që mbështesin Armand Dukën.

Mësohet se për shkak të kundërshtimit është shkarkuar nga puna Petraq Meci, i cili është anëtar i shoqatës.

Prej ditësh, kreu i FSHF, Armand Duka, është vënë në shënjestër të sulmeve politike nga kryetari i bashkisë së Tiranës, Erion Veliaj.

Madje tentativa e parë ka nisur në Tiranë kur kryebashkiaku i Tiranës i bëri presion anëtarëve të shoqatës për të votuar kundër Dukës.

Në audiopërgjimin ai shprehet se do të nisë takimet edhe në rrethe dhe që tashmë është bërë realitet.

Presioni ka vazhduar edhe me zbarkimin e tatimorëve në bizneset e familjes Duka, por edhe me Inspektoratin e Bashkisë në zyrat e FSHF-së.