MPJ: Qytetarët tanë dhe stafi diplomatik në Kazakistan janë të sigurt

Ministria e Punëve të Jashtme, informon se shtetasit e Maqedonisë së Veriut që ndodhen në Kazakistan dhe stafi diplomatik janë të sigurt, transmeton TV21. Nga MPJ bëjnë apel që qytetarët e Maqedonisë së Veriut të mos udhëtojnë në Kazakistan, ndërkaq shtojnë që qytetarët që ndodhen në Kazakistan të mos i lëshojnë objektet ku ndodhen dhe të shmangin tubimet publike.

“Ministria e Punëve të Jashtme e përcjell rregullisht situatën në Kazakistan dhe përmes Ambasadës sonë në Nur-Sulltan është në komunikim të vazhdueshëm me shtetasit tanë që ndodhen atje. Pavarësisht ndërprerjeve të shpeshta të internetit dhe rrjeteve të telekomunikacionit, ka kontakte të rregullta me qytetarët tanë, të cilët ndodhen në lokacione të sigurta.

Deri më tani Ambasadës sonë i janë drejtuar vetëm dy shtetas tanë, për gjëra të vogla, kërkesës së të cilëve iu është përgjigjur menjëherë; por asnjë nga personat nuk është në gjendje të rrezikuar.

Mbeten në fuqi rekomandimet drejtuar qytetarëve të Maqedonisë së Veriut që të mos udhëtojnë në Kazakistan, ndërsa ata që aktualisht ndodhen në vend të mos i lënë objektet ku ndodhen dhe të shmangin tubimet në vende publike për shkak të përkeqësimit të situatës së sigurisë.

Gjithashtu, ju njoftojmë se stafi diplomatik në Ambasadën tonë në Nur-Sulltan nuk është i rrezikuar dhe se i kryen punët pa ndërprerje.
Ministria e Punëve të Jashtme do të vazhdojë të monitorojë zhvillimet në Kazakistan dhe nëse është e nevojshme do të nxjerrë rekomandime shtesë për qytetarët tanë”, theksojnë nga Ministria e Punëve të Jashtme.