FOTO/ Anëtarët e Komisionit të Rithemelimit përpiqen të futen në selinë e PD-së, Basha i sheh nga kafja

Një prej personave që nuk u futën dot në seli, Aldo Bumçi, tha se kjo sjellje i shërben vetëm Edi Ramës.

“Kemi ardhur bashkë me zotin Strazimiri, zotin Ivi Kaso me drejtuesit e 3 degëve të Tiranës, 1, 3 dhe 7. Këto janë zonat që kemi mbuluar me dhe kishim caktuar një mbledhje pune dhe vend tjetër përveç PD-së, shtëpisë sonë nuk ka. Kjo është kthyer në një bunker, që s’ka ndodhur as në ditët më të vështira, as në ‘97. Për herë të parë në 30 vjet, Basha ka mbyllur dyert. Kujt të mire publike i shërben kjo? Nuk i shërben askujt që opozita të kthehet të bunker, në burg, përveç Bashës që të mbajë karrigen tij dhe Edi Ramës. Ai është mbret aty për sa kohë ky njeri është këtu. Kjo është kriminale, projekti për të zhdukur opozitën. Por kjo është opozita e Lulzim Bashës, opozita e vërtetë është ajo e ‘Air Albania’”, tha Bumçi në një prononcim për gazetarët nga oborri i selisë.

Ai shtoi se ditën e Shtunë – kur është thirrur protesta para PD-së – se demokratët do e kthejnë selinë në shtëpinë e lirisë.

Një apel e bëri dhe për figurat politike në PD që mbështesin Bashën:

“Ata që mbështetin zotin Basha janë njerëz politik s’mund të sillen sikur është çështje mes Bashës dhe Berishës, jo, kanë votuar 44 mijë demokratë. 10 përqind e partisë s’mund të dhunojnë 90 përqind”.

Nga gazetarët iu kujtua deklarata e djeshme e Gazment Bardhit, i cili tha se dyert janë kyçur për shkak punimesh dhe për tu futur në seli duhet lajmëruar administrata. A morët leje – u pyet Bumçi.

Ku ta marrim lejen te e-Albania për të hyrë në PD? – u përgjigj ai.

Gent Strazimiri tha se Basha dhe grupi i tij nuk kanë ndërmend të bëjnë betejë kundër qeverisë.

“S’kanë ndërmend të bëjnë beteje, në datë 8 do marrin xhevapin”, u shpreh.

“Me datën 8 janar do të jenë 44 mijë demokratë që do të hyjnë në seli. Kjo është shtëpia e demokratëve, askush nuk mund ti zbrasë oborrin dhe godinën e PD”, shtoi ai.