Ndërmarrja e Ujësjellës-Kanalizimeve Fier u bëri apel sot banorëve të mos konsumojnë ujin e pijshëm nga çezma, pasi sipas analizave të kryera nga Instituti i Shëndetit Publik, ka ngarkesa mikrobike.
Situata problematike vjen pas përmbytjeve të ditëve të fundit në këtë qark.
“Në vijim të komunikimit në lidhje me cilësinë e ujit të pijshëm në Bashkinë Fier, pas situatës se krijuar si pasojë e përmbytjeve, ju bëjmë me dije se nga përgjigjet paraprake të mostrave të ujit të analizuara nga Instituti i Shëndeti Publik, të 9 mostrat në puset që furnizojnë me ujë të pijshëm Bashkinë Fier, rezultojnë me ngarkese mikrobike dhe janë jo konform standardit shtetëror për cilësinë e ujit të pijshëm”, thuhet në njoftim.
Për këtë arsye, UK Fier thekson se “uji nuk rekomandohet për t’u konsumuar si ujë i pijshëm për qytetarët.
“Uji mund të përdoret vetëm për përdorim sanitar deri në një përgjigje të dytë nga ISHP”, thuhet në njoftim.
