Të shtëna me armë zjarri janë shënuar këtë të Enjte në një hotel në autostradën Tiranë-Durrës. Për pasojë, një person mbeti i plagosur.
Dy persona u arresyuan lidhur me ngjarjen, ndërsa dy të tjerë u shpallën në kërkim.
Policia njoftoi se në ambientet e dhomës së një hoteli, në të cilën kanë qenë Markeljan Beqiri, Tefik Shehu, Anxhela Brisku dhe Arni Sulejmani, Beqiri ka tentuar të vrasë me armë zjarri, 20-vjeçarin Sulejmani, banues në Durrës, i cili ndodhet në spital, jashtë rrezikut për jetën.
- 26-vjeçari Markeljan Beqiri, banues në Durrës, është shpallur në kërkim për veprat penale “Vrasja me dashje” mbetur në tentativë dhe “Armëmbajtja pa leje”.
- Në kërkim është shpallur edhe Tefik Shehu, 32 vjeç, për veprën penale “Moskallëzim krimi”.
Gjithashtu janë arrestuar:
- Anxhela Brisku, 22 vjeçe, për veprat penale “Armëmbajtja pa leje”, “Veprime që pengojnë zbulimin e së vërtetës” dhe “Moskallëzim krimi”. Kjo shtetase, menjëherë pas ngjarjes, ka marrë armën e zjarrit dhe e ka fshehur në pjesën e pasme të hotelit, njoftoi policia.
- E.H., 66 vjeç, për veprën penale “Moskallëzimi i krimit”, pasi ka strehuar Brisku, ndërkohë që ka patur dijeni për ngjarjen.
Në cilësinë e provës materiale u sekuestrua arma e zjarrit pistoletë që është përdorur në këtë ngjarje.
