SPAK konfikson hotelin e rrënuar të Admir Hoxhës

Nga BoldNews.al

Prokuroria e Posaçme, SPAK, ka njoftuar këtë të Premte (dt.10.12.2021) konfiskimin dhe kalimin në favor të shtetit të godinës së hotel “Ador” në rrugën Rinas- Fushë Krujë, në pronësi të Admir Hoxhës, një prej të përfshirëve në operacionin “Volvo-4” kundër trafikut të narkotikëve.

Sipas SPAK-ut, vlera e pronës së konfiskuar është rreth 5 milionë euro.

Megjithatë, të dhënat në terren dëshmojnë se njoftimi i prokurorëve speciale është më së paku i fryrë.

Hotel “Ador” prej vitesh është jashtë funksionimit. Ky biznes e ka mbyllur aktivitetin e tij tregtar kohë përpara se të zhvillohej operacioni policor dhe godina e saj është në degradim e sipër.

Sipas të dhënave zyrtare, Admir Hoxha e ka regjistruar hotel “Ador” në Qendrën Kombëtare të Biznesit në Korrik të vitit 2011.

Pas një periudhe të shkurtër, biznesi e ndërpreu aktivitetin e tij, mesa duket për faktin se nuk ishte fitimprurës.

Në 3 Tetor 2018, pronari i saj, Admir Hoxha, vendosi të pezullojë zyrtarisht aktivitetin tregtar të hotel “Ador”.

Ky pezullim aktiviteti ka ardhur disa kohë përpara se të zhvillohej operacioni “Volvo-4”, pas të cilit ai është shpallur në kërkim, si i akuzuar për pjesë e një grupi që merrej me trafik narkotikësh nga Shqipëria drejt Italisë.

Në 22 Tetor të vitit 2019, drejtuesit më të lartë të Policisë së Shtetit dhe të ish-Krimeve të Rënda prezantuan rezultatet e operacionit masiv “Volvo-4”, ku u arrestuan një numër i konsiderueshëm personash.

Me kalimin e kohës, një pjesë prej tyre u liruan nga qelitë, ndërkohë që zyrtarë të rëndësishëm të Partisë Socialiste, të përgjuar në komunikime me anëtarët e grupit kriminal të Shijakut nuk u proceduan asnjëherë penalisht.

Operacioni “Volvo-4”, edhe pse gjysmak, u konsiderua shumë i suksesshëm nga ish-ministri i Brendshëm i asaj kohe, Fatmir Xhafaj.

Pak ditë pas ekzaltimit të tij, Xhafaj u detyrua të japë dorëheqjen nga posti i rëndësishëm qeveritar.