Pas tre muajve do të informojmë se sa para janë mbledhur nga pagesa e qeseve të biodegradueshme

Ministri i Mjedisit Jetësor dhe Planifikimit Hapësinor, Naser Nuredini në brifingun e sotëm sqaroi se thelbi i ndryshimeve të reja në lidhje me pagesën e qeseve të biodegradueshme është që të ngritet vetëdija publike për shfrytëzimin e çantave, gjegjësisht të ulet përdorimi i plastikës.

Ai theksoi se qëllimi kryesor nuk është të merren para nga qytetarët, por të ndryshojë mënyra e blerjes dhe qytetarët ti kushtojnë rëndësi ndotjes së mjedisit jetësor.

“Standardet mbesin të njëjta siç është në Ligjin e vjetër për menaxhim me mbeturina. Kjo nënkupton se prodhuesit mund të vazhdojnë të prodhojnë qese të plastikës me këso standarde, të cilat janë të biodegradueshme,  deri më 1 qershor të vitit 2023”, deklaroi Nuredini.

Ministri theksoi se ideja nuk është se presin para për Fondin, por që të ulet përdorimi i plastikës.

“Do të informojmë publikisht dhe në mënyrë transparente në tremujorin e parë të vitit të ardhshëm se sa para janë mbledhur në Fond dhe çfarë do të bëjmë me ato mjete”, tha Nuredini.

I pyetur se a do të ndryshojnë ambalazhet e plastikës, ministri sqaroi se ato tashmë paguhen përmes sistemit për përgjegjësi të zgjeruar të prodhuesve.

“Ne do të vazhdojmë deri më 1 qershor 2023 me të njëjtat standarde, prodhuesit kanë një vit e gjysmë që të vazhdojnë me këto standarde dhe të ndryshojnë”, tha Nuredini, duke shtuar se mikroplastika është e dëmshme për tokat dhe ujërat tona dhe se me ligje dhe hapa të tillë ata duan të mbrojnë shëndetin e qytetarëve.

Ministri përkujtoi se sipas Ligjit për Përgjegjësi Sociale, prodhuesit që përdorin ambalazhe paguajnë tarifë çdo vit. Kjo tarifë mblidhet nga grumbulluesit kolektivë të mbetjeve, të cilët më pas kanë përgjegjësinë me ato fonde të blejnë pajisje për riciklim dhe klasifikim të mbetjeve.

Ndryshe, prej sot me ligj ndalohet përdorimi i qeseve të plastikës për mbajtjen e mallrave. Do të shiten vetëm qese plastike të biodegradueshme me çmim prej 15 denarëve. Sipas Ministrisë së Mjedisit Jetësor dhe Planifikimit Hapësinorë, mjetet financiare që do të mblidhen, do të shkojnë në fond me të cilin do të investohet në mjedisin jetësorë. Prej sot gjithashtu objektet e hotelerisë e kanë të ndaluar të përdorin plastikë në zonat e mbrojtura si në Pelister, Mavrovë, Mali Sharr, etj.