Zbardhet dinamika e atentatit në Astir, dyshime se janë grup vrasësish me pagesë

Zbardhet dinamika e atentatit me dy viktima mbrëmjen e djeshme në zonën e “Astirit” në Tiranë. Sipas burimeve, mësohet se automjeti tip “Audi” ku udhëtonin viktimat, Erigels Mihasi dhe Armando Dumani është qëlluar në lëvizje. Sipas burimeve, autorët kanë qëlluar në drejtim të mjetit me breshëri automatiku për rreth 50 m.

Si autmojeti “Audi”, ashtu edhe ai i autorëve, referuar burimeve nga grupi hetimor, kanë udhëtuar nga “Pallati me Shigjeta” në drejtim të rrethrotullimit të ish-sheshit Shqiponja.

50 m përpara zonës së quajtur “2 rrathët”, autorët pasi kanë gjetur terren kanë qëlluar në drejtim të objektivit të tyre, duke i marrë jetën shoferit dhe pasagjerit. Hetuesit kanë hedhur dyshime se kemi të bëjnë me një ngjarje të mirëorganizuar dhe vrasësit kanë qenë profesionist.

Edhe pse mjetet ishin në lëvizje, pothuajse të gjithë plumbat që janë zbarazur nga armët e tyre kanë kapur automjetin “Audi”. Për këtë shkak hetuesit kanë hedhur dyshime se kemi të bëjmë me një grup vrasësish me pagesë. Të paktën 6 persona dyshohet se kanë marrë pjesë në krimin e rëndë, ku secili ka pasur rolin e tij.

Hetuesit kanë sekuestruar dhjetëra kamera sigurie, e po punojnë për identifikimin e autorëve, ku ka dyshime se autorët që ishin në automjetin “Toyota” informoheshin për lëvizjet e Mihasit dhe Dumanit.