VIDEO/ Basha: Nga Vettingu i politikanëve te zhbërja e ndryshimeve Kushtetuese, ja prioritet e PD

Partia Demokratike ka vendosur të dorëzojë në Kuvend amendamente për ndryshime kushtetuese që lidhen me reformën territoriale si dhe reformën zgjedhore.

Vendimi është marrë në mbledhjen e sotme të grupit parlamentar të Partisë Demokratike.

Grupi i PD ka vendosur që ditën e mërkurë të dorëzojë në Kuvend amendamentet përkatëse, si dhe të kërkojë që politikanët t’i nënshtrohen një procesi vetingu.

Pas mbledhjes së Grupit Parlamentar, Lulzim Basha tha se do të depozitohet në Kuvend kërkesa për zhbërjen e ndryshimeve Kushtetueses të miratuara në korrik, në mënyrë të njëanshme dhe jo-kushtetuese. Në këtë kuadër, Basha tha se do të kërkohet ngritja e Komisionit për Reformën Zgjedhore.

Gjithashtu Basha tha se do të depozitohet kërkesa për vetting-un e politikanëve, familjarëve të tyre, lidhjeve që kanë publike ose jo. Në këtë kuadër, kreu demokrat tha se SPAK duhet të hetojë të zgjedhurit vendorë, deputetët, ministrat, Kryeministrin dhe çdo zyrtar tjetër të lartë të vendit.

Kreu demokrat përcaktoi si prioritet edhe reformën territoriale, për të cilën tha se do të depozitohet në Kuvend drafti me propozimet përkatëse.

“Komisioni i Venecias ka shtruar rrugën lidhur me vettingun e politikanëve. Ne kemi hartuar amendamentet në përputhje me rekomandimet apo opinionet e Venecias”, tha Basha.

Ai tha se vettingu i politikanëve do të synojë një politikë të re, politikanë të palidhur me krimin dhe që të jenë në gjendje që të justifikojnë pasuritë e tyre.

“Jemi në Kuvend me një qëllim: që me fuqinë që na dhanë shqiptarët të rikthejmë vendin në shinat e demokracisë dhe për këtë arsye ne do të çojmë përpara agjendën tonë që i shërbejnë shqiptarëve dhe Shqipërisë”, tha Basha.

Lidhur me zgjatjen e afateve të Komisioneve të Vetting, Basha tha se opozita nuk bën pazare dhe as do të futet në pazare.

Lajme të Ngjashme