Shqipëria nuk ka pasur kurrë më parë kaq shumë futbollistë në nivelin evropian

Në prag të ndeshjes që e ka Shqipëria nesër kundër San Marinos, në kuadër të kualifikimeve për në botërorin “Katar 2022”, ka folur në konferencë për shtyp kapiteni, Elseid Hysaj.

Hysaj vlerësoi forcën e grupit dhe vlerën e lojtarëve që ka Kombëtarja në përbërje, me lojtarë të shumtë që janë në nivele të larta, përcjell Klankosova.tv.

Besimi i skuadrës – Vetëbesimin e kemi që më parë, por po e forcojmë  akoma edhe më shumë, sepse vërtetë jemi një skuadër shumë e fortë dhe besoj se Shqipëria nuk ka pasur kurrë më parë kaq shumë futbollistë në nivelin evropian dhe që aktivizohen në skuadrat që luajnë tani. Kështu që duhet të kemi besim në vetvete sepse jemi vërtetë një skuadër shumë e fortë që duhet thjesht të shkojë në fushë me vetëbesimin që mund të bëjmë më mirë, siç e pamë edhe në ndeshjen ndaj Hungarisë, sepse me të vërtetë luajmë mirë dhe kishim raste për të shënuar gola. Për të ardhmen kjo na duhet, besimi në vetvete që jemi një skuadër e fortë dhe mund të luajmë me të gjitha ekipet.

Kundërshtari direkt, Hungaria apo Polonia? – Të dyja këto skuadra janë në nivele të mira, por thjesht Polonia, siç e dimë të gjithë ka Levandovskin, një lojtar me emër në të gjithë botën që bën diferencën në fushë. Kurse Hungaria është një ekip që punon si ne, një ekip i mbledhur që përpiqet të bëjë mirë. Me të dyja ekipet do kemi konkurrencë deri në fund të kompeticionit për vendin e dytë.

Grupi- Kemi edhe në mesfushë edhe në sulm, pasi siç e pamë edhe në ndeshjen ndaj Hungarisë, mesfusha dha maksimumin dhe ishin të rëndësishme lëvizjet që bënin në fushë. E rëndësishme është të kemi edhe sulmuesit që të shënojnë, dhe këtë po e bëjnë. Cikalleshi shënoi në Poloni, Broja sapo hyri, i dha një dorë skuadrës dhe me të vërtetë ndërrimet janë të rëndësishme në këtë kompeticion. Një minutë lojë mund të ndryshojë të gjithë ndeshjen, siç ndodhi edhe në ndeshjen ndaj Hungarisë. Besoj se me kohën do kemi edhe më shumë vlera në mesfushë dhe sulm.

Ndeshjet e kthimit ndaj Hungarisë dhe Polonisë- Kemi mundësi të marrim pikë ndaj Polonisë dhe Hungarisë. Ndaj San Marinos, ne jemi një ekip i favorizuar dhe 3 pikshi duhet të jetë i yni. Kurse ndeshjet ndaj Polonisë dhe Hungarisë, mezi i presim, sepse në Poloni na ka mbetur pak inati, sepse ndeshjen e bëmë ne. Të gjitha statistikat ishin në favorin tonë. E kemi parë edhe njëherë ndeshjen se si kemi luajtur  dhe kishim gabime personale, por duhet t’i rregullojmë sa më shpejt dhe besoj që do të jenë ndeshjet më të bukura që do bëjmë në këtë kompeticion, si me Poloninë dhe me Hungarinë”, përfundoi Hysaj.