Pas përjashtimit nga Grupi Parlamentar të Berishës, Basha mbledh deputetët/ Prapaskenat e një vendimi

Kreu demokrat Lulzim Basha njoftoi sot vendimin e tij për përjashtimin e Sali Berishës nga Grupi Parlamentar i PD, deri në zbardhjen e çështjes lidhur me përfshirjen e tij në listën e zezë nga Departamenti amerikan i Shtetit.

Ndërsa vlerësoi Berishën si një lider historik dhe për arritjet që ka pasur Shqipëria gjatë qeverisjes së tij, Basha tha se ky ishte një nga vendimet e vështira, por që është marrë prej tij në interesin e PD dhe demokratëve, që e konsiderojnë SHBA si një partner strategjik.

Ndërkohë që pas leximit të një deklarate, raportohet se kreu demokrat Lulzim Basha ka thirrur një mbledhje të grupit parlamentar.

Por me kë u konsultua Basha për marrjen e vendimit për përjashtimin e Berishës si deputet i PD?

Mësohet se në orën 17.30, Basha ka njoftuar Kryesinë e Grupit Parlamentar për një mbledhje në orën 18:30 në selinë e PD. Rreth 90 minuta më pas, kreu demokrat u shfaq në zyrën e tij duke artikuluar vendimin, ndërsa më pas ka thirrur një mbledhje grupi. Nuk dihet nëse vendimin Basha e ka marrë me Kryesinë e Grupit, apo ata i ka njohur me vendimmarrjen, për të cilën tha se ishte e tija.

Sikundër nuk dihet nëse deputetët demokratë, disa prej të cilëve kanë qenë ndër bashkëpunëtorët e afërt të ish-Kryeministrit do të reagojnë lidhur me vendimin, apo do e trajtojnë si një çështje tashmë të mbyllur.

Nëse i referohemi deklaratave të fundit të Berishës, i cili tha se vendi i tij është si deputet i Parlamentit, në grupin e deputetëve demokratë, dhe nëse do të kishte përjashtim të njëanshëm të tij, pa prova dhe fakte, ai do të angazhohej fuqimisht për të rikthyer PD në partinë e vlerave, sikundër ka qenë, pritet që të ketë një reagim të fortë të ish-Kryeministrit dhe liderit historik të PD.

Berisha pritet të reagojë në të paktën dy emisione televizive lidhur me vendimin, i cili deri para pak orësh dukej i pamundur për faktin se kreu demokrat pothuajse kishte shmangur çdo koment dhe reagim lidhur me çështjen dhe aq më tepër kur vetë ai kishte kërkuar transparencë lidhur me vendimin e DASH.

Nuk dihet nëse vendimin për përjashtimin e Berishës nga Grupi Parlamentar e ka bazuar në ndonjë fakt apo provë me të cilvn mund të jetë njohur, por edhe në deklaratën për mediat Basha vuri theksin pikërisht në bërjen transparente të çështjes.

Lajme të Ngjashme