Laert Duraj mbyll mandatin në “Postën Shqiptare” me një tender pa garë 60 milionë lekë

Nga BoldNews.al

Në 30 Korrik 2021, Ministrja e Financave, Anila Denaj, firmosi largimin nga detyra e Administratorit të “Posta Shqiptare sha”, Laert Duraj, pasi ai pritet të marrë mandatin e deputetit në këtë fillim shtatori.

Por, në të njëjtën ditë, kur Duraj pritet t’i lëshonte zyrën drejtuesit të përkohshëm, Hipokrat Biba, “Posta Shqiptare” shpall një tender me vlerë 60 milionë lekë të vjetra, për shërbimin e transportit për punonjësit e zyrës së Tranzitit.

Transporti i punonjësve të kësaj zyre, e cila punon edhe natën, kur nuk ka shërbim urban, megjithëse është një nismë pozitive, procedura e ndjekur në ditën e fundit të punës së Laert Duraj është tërësisht e dyshimtë.

“Posta Shqiptare” zgjodhi të zhvillonte këtë tender me procedurën e “negocimit, pa shpallje paraprake”, një formë e veçantë prokurimi që kryhet vetëm në kushtet e emergjencës ose kur shërbimi ofrohet vetëm nga një numër i kufizuar operatorësh në treg.

Por, në rastin e tenderit “Shërbim Transporti për Punonjësit e Filialit të Posta Shqiptare sh.a., Qendra Tranzite”, nuk duket se plotësohet asnjë prej kushteve për të zhvilluar tender pa garë.

Së pari, shërbimi i transportit është i përhapur gjerësisht dhe shumë kompani private e ofrojnë atë prej vitesh.

Së dyti, ‘Posta Shqiptare” nuk ishte aspak në kushtet e emergjencës për sigurimin e këtij shërbimi.

Ky fakt konstatohet lehtësisht në një shkresë të nënshkruar nga Laert Duraj që në muajin Shkurt 2021.

Në dokumentin “Regjistri i Parashikimeve të procedurave të prokurimit publik për vitin kalendarik 2021”, të nënshkruar nga Duraj, në pikën 38 të tij është shënuar “Shërbim Transporti për Punonjësit e Filialit të Posta Shqiptare sh.a., Qendra Tranzite”.

Për këtë tender ishte planifikuar fondi prej 6 milionë lekë të reja, me burim nga të ardhurat e vetë Postës, si edhe ishte vendosur që tenderi të zhvillohej brenda muajit Mars 2021.

Pra, duket qartë se për këtë shërbim nuk ka pasur asnjë urgjencë, pasi ka qenë pjesë e planifikimit vjetor të institucionit.

Për arsye të paqarta, Posta Shqiptare ka vendosur ta shtyjë zhvillimin e kësaj procedure në fund të Korrikut, pikërisht në ditën që Laert Duraj i la vendin Hipokrat Bibës.

Sipas të dhënave të Agjencisë së Prokurimit Publik (APP), tenderi u zhvillua me procedurë të mbyllur, pra me “negociim, pa shpallje paraprake”.

Tenderi u fitua nga shoqëria “Partner Travel Company”, e cila do të ofrojë shërbimin me 59 milionë lekë të vjetra ose 1 milionë lekë të vjetra më pak se sa fondi limit.

Lajme të Ngjashme