Goal dhe asist në fitoren e thellë të Fernecvarosit, Uzuni e bën “sefte” në kampionat

Myrto Uzuni, protagonist absolut në radhët e Ferencvarosit në fitoren 4-1 përballë Mezokovesd-Zsory, në takimin e javës së dytë të elitës së futbollit hungarez. Sulmuesi shqiptar shërbeu për sulmuesin sllovak, Robert Mak, që shënoi golin e rezultatit të përkohshëm 2-1 në minutën e katërt shtesë të pjesës së parë, vetëm pak çaste pasi futbollisti nga Bregu i Fildishtë, Franck Boli kishte barazuar rezultatin, me ndeshjen që ishte zhbllokuar që në minutën e 7-të nga Nagy i skuadrës mike.

Uzuni, shumë aktiv në fazën sulmuesi, mori një top të gjatë në zonën e kundërshtarit në minutën e 68-të dhe kryesori vetëm pasi u sinjalizua nga sistemi VAR akordoi 11-metërsh. Ekzekutimin e penalltisë e mori përsipër vetë Uzuni, që shënoi golin e tretë për skuadrën e tij në këtë ndeshje dhe të parin personal në kampionat.

Në kohën shtesë Boli realizoi edhe të katërtin për Ferencvarosin, që rikthehet tek fitorja pas asaj disfate të papritur 1-2 në javën e parë kundër Kisvardas së Herdi Prengës.