A duhet të alarmohemi për rastet e riinfektimit me COVID-19 pas vaksinimit?

Raportet e njerëzve që riinfektohen me koronavirus përkundër vaksinimit mund të tingëllojnë alarmante, por ekspertët e lartë të shëndetit thonë se ka shumë prova që vaksinat po bëjnë pikërisht atë që supozohet të bëjnë, po pakësojnë gjasat e rëndimit të sëmundjes dhe vdekjen.

Treguesi më i mirë sipas tyre është se shtrimet në spitale dhe vdekjet në SHBA janë pothuajse të gjitha nga të pavaksinuarit. Sipas Anthony Fauci, specialisti i lartë i sëmundjeve infektive nga qeveria amerikane, riinfektimi me koronavirus nuk do të thotë që vaksina po dështon.

Në fakt autoritetet shëndetësore kanë paralajmëruar se edhe pse vaksinat kundër COVID-19 janë tepër të efektshme , rreth 95%, ato nuk janë perfekte. Por, derisa varianti Delta filloi të përhapet, rreziku i riinfektimit filloi të merrte shumë vëmendjen e publikut.

Qendrat Amerikane për Kontrollin dhe Parandalimin e Sëmundjeve kanë thënë për muaj që njerëzit e vaksinuar nuk kanë nevojë as të testohen pas ekspozimit ndaj të infektuarve nëse nuk shfaqin simptoma. Agjencia citon prova të kufizuara që të vaksinuarit që infektohen pa simptoma, kanë më pak të ngjarë ta transmetojnë virusin te të tjerët, sesa ata që ende nuk e kanë marrë vaksinën.

“Riinfektimi ka tendencë të jetë i lehtë, sepse sistemi imunitar i një personi të vaksinuar nuk ka pse të fillojë nga e para për të luftuar koronavirusin. Edhe nëse virusi depërton kundër antitrupave të nxitur nga vaksina, mbrojtjet dytësore hyjnë në veprim dhe zakonisht, virusi ndalet brenda disa ditësh”, tha imunologu i Universitetit të Pensilvanisë, Scott Hensley, raporton Apnews, transmeton Klankosova.tv.

The post A duhet të alarmohemi për rastet e riinfektimit me COVID-19 pas vaksinimit? appeared first on Klan Kosova.