Pas “non grata”-s ndaj Berishës, tjetër “goditje amerikane” për PD-në, sërish nga gjuha e Blinkenit

Pas shpalljes “non grata” të liderit historik Berisha, PD ka marrë një tjetër goditje amerikane bash në kohën kur Basha predikon “masakrën zgjedhore”.

Po me gojën e Sekretarit Blinken, njeriut që zbërtheu “non grata”-n e Berishës, zgjedhjet e 25 prillit ishin një arritje për Shqipërinë. Këtë, kreu i diplomacisë amerikane e thotë në një letër dërguar kryeministrit Rama.

“I nderuar Z. Kryeministër:

Urime për ju dhe partinë tuaj për suksesin tuaj elektoral. Unë gjithashtu dua të përgëzoj popullin e Shqipërisë që, megjithë kufizimet e pandemisë COVID-19, ushtroi të drejtat e tyre themelore në zgjedhjet e 10-të kombëtare të vendit që nga rënia e komunizmit.

Unë pres që të punoj me ju gjatë mandatit tuaj të tretë si Kryeministër për të forcuar më tej bashkëpunimin tonë mbi demokracinë dhe mbrojtjen, si dhe tregtinë dhe investimet.

Ne do të vazhdojmë të mbështesim Shqipërinë ndërsa punon për të forcuar shtetin e së drejtës, për të përmirësuar llogaridhënien e qeverisë dhe për të kryer reformën në drejtësi. Përmes këtyre zgjedhjeve paqësore, Shqipëria ka demonstruar më tej gatishmërinë e saj për të hapur negociatat e pranimit në BE. Shqipëria është një Aleate e fortë e NATO-s dhe ne ju përgëzojmë për përparimin tuaj drejt Betimit të Uellsit.

Ne jemi mirënjohës për bashkëpunimin tonë në fushën e mbrojtjes dhe e vlerësojmë shumë Shqipërinë për pritjen e Defender 21.

Ne përballemi me shumë kriza në të gjithë globin, dhe unë kam besim se së bashku mund të ngrihemi për të përmbushur këto sfida historike. Ne kemi një mundësi dhe një përgjegjësi për të ndërtuar një të ardhme paqësore të rrënjosur në liri dhe prosperitet për të gjithë.

Sinqerisht, Antony J. Blinken”, përfundon letra.

Kujtojmë se faktori ndërkombëtar shënoi një precedent në zgjedhjet e 25 prillit, pasi e njohu rezultatin edhe para se të shpallej nga KQZ.

.