Pas 20 vjetësh, Amerika miraton ilaç të ri për Alzheimer

Agjencia e Ushqimit dhe Barnave në Amerikë (FDA) e ka miratuar përdorimin e ilaçit eksperimental aducanumab për trajtimin e fazave të hershme të sëmundjes Alzheimer – edhepse një komitet këshillues në këtë agjenci kishte ardhë në përfundim vitin e kaluar se nuk ka prova të mjaftueshme për ta mbështetur efikasitetin e këtij trajtimi.

Ilaçi u krijua për pacientët me dëmtime të lehta, jo për ata me dementia (harresë) të rëndë derisa po synohet të ngadalësojë progresin e sëmundjes – jo thjesht lehtësimin e simptomave.

FDA nuk e ka aprovuar një terapi të re për sëmundjen e Alzheimerit që nga viti 2003, shkruan CNN, përcjell Klankosova.tv.

Kjo agjenci e ka aprovuar ilaçin aducanumab, që ndryshe njihet edhe si Aduhelm, duke e përdorur programin “për miratim të përshpejtuar” që lejon miratimin e një ilaçi për një sëmundje kërcënuese për vdekje edhepse mund të nevojiten më shumë studime për përfitimet e tij.

Dr. Patrizia Cavazzoni, drejtoreshë e Qendrës së FDA për Vlerësimin e Barnave, ka theksuar se përfitimet e ilaçit kanë tejkaluar rreziqet e terapisë.

“Ka pasur një debat të konsiderueshëm publik nëse aducanumab duhet të miratohet. Siç ndodh shpesh kur bëhet fjalë për interpretimin e të dhënave shkencore, komuniteti i ekspertëve ka ofruar perspektiva të ndryshme”, ka thënë ajo.

Nën aprovimin e përshpejtuar, ilaçi aducanumab do të studiohet ende. Me këtë program kompanive farmaceutike iu kërkohet të kryejnë “studime pas miratimit” për të verifikuar që trajtimet kanë përfitime klinike. Nëse prova aprovuese nuk e verifikon përfitimin e ilaçit, atëherë FDA mund ta heqë ilaçin nga tregu.

Ndërsa, personave që vuajnë nga sëmundja e Alzheimerit dhe familjarëve të tyre ky ilaç iu ka dhënë shpresë.

The post Pas 20 vjetësh, Amerika miraton ilaç të ri për Alzheimer appeared first on Klan Kosova.