As kryetar shqiptar, as ligji për dëshmorët, Ali Ahmeti shpall platformën për gjelbërim

Kryetari i Bashkimit Demokratik për Integrim, Ali Ahmeti sot ka bërë publike fushatën e re të partisë së tij. E paralajmëruar prej para disa ditëve, nga kjo parti nuk dhanë detaje se çka mund të jetë befasia. Në rrjete dhe në media dolën disa variante. Ndër më kryesoret ishin sjellja e Ligjit për veteranët e UÇK’së, invalidëve të luftës dhe familjeve të dëshmorëve, si një premtim i kahmotshëm i kësaj partie. Por nuk ishte kjo. Aludim tjetër mediatik ishte se mund të propozohet kandidat shqiptar për Qytetin e Shkupit, pas idesë për “kryeministër shqiptar”, por edhe kjo nuk ishte e saktë, shkruan in7.

“Për një të ardhme të gjelbër”, quhet fushata e re e BDI’së dhe ka të bëjë me njy fushatë për ruajtjen e ambientit jetësor. Sipas Ali Ahmetit çështjet me karakter kombëtar dhe integrues tashmë janë përfunduar, prandaj partia e tij, në 19 vjetorin e themelimit fillon një faqe të re në jetën politike.

Në fjalën e tij, Ahmeti numëroi dështimet institucionale në ruajtjen e ambientit, ndërsa theksoi se faji nuk është vetëm i institucioneve, por një pjesë e mirë e fajit, sipas Ahmetit, është e neve qytetarëve./in7.tv