Udhëtojnë kilometra për në shkollë, nxënësit në Bërnjancë kërkojnë zgjidhje

Nga fshati Bërnjancë deri në Haraçinë, plot 3 km udhëtim ju nevojitet të bëjnë çdo ditë fëmijëve të klasave të ulëta nga Bërnjanca për të ndjekur procesin mësimor. Edhe pse në fshatin e tyre ekziston shkollë ata nuk mund të regjistrohen në të pasi një gjë të tillë duhet ta lejojë komuna Gazi Babë.

Duke treguar për sfidat me të cilat ballafaqohen, nxënësit shfaqin një kërkesë, të mësojnë në shkollën më të afërt.

“E kemi shkollën larg, duhet të kalojmë rrugën kryesore, ka qenë… Më vështirë e kemi dimrit ku bie shi.”,- tha një nxënës.

“Dua të mësoj në shkollën që kam më afër shtëpisë.”,- theksoi një qytetar.

Shkolla Fillore “Kërsto Misirkov” në fshatin Bërnjancë që është nën kompetenca të komunës së Gazi Babës ka vetëm 8 nxënës të regjistruar të komuniteti maqedonas. Atë që e kërkojnë banorët e fshatit është që në këtë shkollë të mund të vijojnë procesin edukativo-arsimor edhe fëmijët e tyre.

Nëse nuk zgjidhet ky problem, shprehen se fëmijët e tyre do të bojkotojnë procesin mësimor.

“Janë rreth 60 fëmijë që udhëtojnë. Pasojat nuk numërohen sa cilat janë dhe sa janë. Ne jemi që t’i bojkotojmë dhe mos me t’i dërgojmë fëmijët në shkollë se mendojmë se më e shtrenjtë është jeta se sa arsimimi.”,- theksoi prindi, Ekrem Saliu.

“Këta janë të vegjël, duhet të kalojnë rrugën kryesore, ka qenë endacak shumë dhe frikësohen. Nuk ka kush t’i sjellë. Shumë herë ka ndodhur pasi nuk ka pasur kush t’i sjellë.”,– u shpreh prindi, Bashkim Sabedini.

Komuna e Gazi Babës shpeshherë ka refuzuar të gjejë zgjidhje rreth këtij problemi, por drejtori i Shkollës Fillore “Gjergj Kastrioti Skënderbeu” në Haraçinë theksoi se është njoftuar që të premten dhe do të bëjë përpjekje të zgjidhet problemi.

Do të kërkohet vetëm shfrytëzimi i objektit të Shkollës “Kërsto Misirkov”, tha Akiu.

“Me punëtorët tanë do të angazhohemi vetëm se t’iu dalim në ndihmë fëmijëve. Vetëm objektin do ta kërkojmë sepse vërtetë duhet t’iu ndihmojmë, është shumë larg diku rreth 3 km janë.”,- tha drejtori i Sh. F. “Gjergj Kastrioti Skënderbeu”, Azam Aki.

Problemit me nxënësit e fshatit Bërnjancë nga mungesa e vullnetit të palëve të përfshira ngurohet t’i jepet fund, aktualizohet thuajse në çdo nisje të vitit shkollor apo cikël të regjistrimit të nxënësve.(TVM2)