Turqia kërkon nga BE të përmbahet nga përsëritja e gabimeve të së kaluarës

Ministri i Punëve të Jashtme të Turqisë, Mevlüt Çavuşoğlu, i bëri thirrje Bashkimit Evropian (BE) të jetë i sinqertë, të veprojë në mënyrë strategjike dhe të përmbahet nga përsëritja e gabimeve të së kaluarës, në mënyrë që marrëdhëniet me Turqinë të zhvillohen më tej.

Duke folur në një konferencë të përbashkët për media me homologun e tij sllovak Ivan Korçok në Ankara, Çavuşoğlu komentoi marrëdhëniet midis Turqisë dhe BE-së, duke thënë se negociatat midis dy palëve qëndrojnë mbi motive politike.

“Ne mbetëm vetëm me marrëveshjen e migracionit dhe kur e shikojmë atë, është e qartë se Turqia ka përmbushur të gjitha detyrimet e saj në kontekstin e kësaj marrëveshje që nga viti 2016. BE-ja nuk përmbushi detyrimet e saj, nuk mundi, nuk donte“, tha Çavuşoğlu.

Duke deklaruar se BE ka marrë një qëndrim plotësisht kundër Turqisë në vitin e kaluar me një kuptim të solidaritetit brenda bllokut në kurriz të konfliktit me vlerat e saj, ai tha se BE “duhej të mbështeste politikat e padrejta dhe kërkesat maksimaliste të vendeve të saj anëtare”.

Çavuşoğlu kujtoi samitin e udhëheqësve dhjetorin e kaluar dhe tha se u vërejt një ambient pozitiv midis zyrtarëve turq dhe atyre të BE-së.

“Që marrëdhëniet Turqi-BE të zhvillohen më tej, BE duhet të përmbahet nga përsëritja e gabimeve të së kaluarës, të jetë e sinqertë dhe të veprojë në mënyrë strategjike“, shtoi ai.

Nga ana e tij, kryediplomati sllovak përshëndeti marrëdhëniet dypalëshe me Turqinë, duke shprehur vullnet për thellimin e mëtejshëm të marrëdhënieve.

“Turqia është një aleat i rëndësishëm në NATO. Jo vetëm një partneritet, por ka një aleancë shumë të rëndësishme midis Turqisë dhe Sllovakisë“, tha Korçok.

.