Zyrtare, David Alaba konfirmon largimin nga Bayern Munich në fund të sezonit!

Pas 13 vitesh David Alaba vendos të largohet zyrtarisht nga Bayern Munich, klubi ku hodhi hapat e tij të parë në karrierë, u bë njohur si futbollist dhe fitoi plot 24 trofe. Nëpërmjet një konference për shtyp anësori austriak i transferuar te skuadra e të rinjëve të Bayernit nga Austria e Vjenës në vitin 2008, ka zbuluar publikisht se nuk do të rinovojë kontratën që i skadon në fund të këtij sezoni me kampionët e Gjermanisë. Një vendim i vështirë ky të cilin 28-vjeçari e komentoi kështu:

“Unë kam marrë vendimin për t’u larguar në fund të këtij sezoni për të provuar diçka të re. Është e qartë që ky nuk ka qenë një vendim i lehtë për mua. Kam qëndruar në këtë klub për 13 vite dhe kjo do të thotë shumë. U jam mirënjohës të gjithëve në klub për këto 13 vite të mrekullueshme të kaluara sëbashku. Bayerni do të jetë gjithmonë familja ime”, deklaroi Alaba. Për mbrojtësin austriak i cili mund të përshtatet edhe si mesfushor interesohen dy klubet e Manchester-it City dhe United, me skuadrën e Guardiolës që është më e avantazhuar për të firmosur me Alabën me parametër zero. Gjithsesi në pole-position për të firmosur me 28-vjeçarin është Reali i Madridit me klubin merengues që e ndjek prej kohësh anësorin austriak. Në këtë sezon Alaba ka mundësi për të fituar edhe 2 trofe të tjerë me Bayernin për ta çuar në total në 26 numrin e tyre, ndërkohë që deri tani me klubin bavarez numëron në total 415 paraqitje dhe 33 gola në të gjithë kompeticionet.