Prenga në pankinë, Uzuni shënon sërish dhe shmang humbjen e Ferencvaros

Myrto Uzuni shkruan sërish emrin në listën e golshënuesve të Ferencvaros, pasi mbrëmjen e sotme shënoi golin e vetëm në barazimin 1-1 të skuadrës së tij në ndeshjen ndaj Kisvarda.

Sulmuesi i Kombëtares Shqiptare luajti gjatë gjithë 90-minutëshit dhe gjeti golin e barazimit në fillim të pjesës së dytë, pasi miqtë kishin shënuar në pjesën e parë, por Ferencvaros nuk ia doli të përmbysë rezultatin.

Vlen të theksohet se në pankinën e Kisvardas ishte edhe mbrojtësi Herdi Prenga, i cili firmosi me këtë skuadër vetëm dy ditë më parë, pasi kishte përfunduar kontratën me letonezët e Rigës.

Ky ishte goli i tretë në vetëm një javë për Myrto Uzunin, që ka luajtur 20 ndeshje me fanellën e Ferencvaros dhe ka shënuar 6 gola, ndërsa klubi hungarez kryeson renditjen në kampionat, i shkëputur me 9 pikë nga ndjekësja më e afërt.