Lazim Destani, kandidat i mundshëm i ASH – AAA për Tetovën?

Teksa po afrohet fundi i këtij mandati të kryetarëve të komunave po shtohen zërat për kandidatë të mundshëm në zgjedhjet e ardhshme lokale. Gara më interesante pritet të zhvillohet në Tetovë, ku deri tani janë përfolur disa emra. Përderisa BDI kalkulon ende me emrin e Teuta Arifit, e cila po përfundon mandatin e dytë, për ta fituar këtë komunë në garë hyn edhe opozita shqiptare e përfaqësuar nga Aleanca për Shqiptarët dhe Alternativa.

Portali “zyrtare.net” jo zyrtarisht mëson se biznesmeni i fuqishëm nga Tetova, Lazim Destani mund të jetë kandidati i opozitës shqiptare, por me mbështetje më të gjërë edhe nga subjekte tjera. Destani është përfolur në çdo cikël zgjedhor, por çdoherë e ka përjashtuar këtë mundësi.

Tentuam të marrim një prononcim nga blloku opozitar por këta të fundit nuk deshën të flasin rreth kësaj çështje me preteksin se ende ka kohë për zgjedhjet lokale dhe se është ende heret të flitet për emra.

Megjithatë burime të “zyrtare.net” këmbëngulin se këtë herë bisedimet bëhen në nivel më të lartë dhe serioz, prandaj gjasat, që më në fund biznesmeni Destani të pranojë kandidaturën janë shumë të mëdha.

Sidoqoftë, periudha në vazhdim do të jetë me zhvillime shumë interesante edhe në komunat tjera, ku opozita dhe pushteti nuk kanë dallime të mëdha në vota./zyrtare.net/