“Pamjet dëshmojnë se PD dhe LSI fshihen pas protestave të dhunshme”

Ministrja e Drejtësisë, Etilda Gjonaj është shprehur sot se, kanë në dispozicion pamje filmike që tregojë aktorët politikë të PD-së dhe LSI-së që fshihen pas protestave të dhunshme të ditëve të fundit. Ministrja thotë se, Prokuroria duhet të hetojë dhe tregojë se kush fshihet pas protestave të të miturve.

“Absolutisht. Si ministri i drejtësisë, si kryeministri e çdo qytetar duhet t’ia lërë në dorë organeve të drejtësisë. Jam prekur nga letra e shkruar nga babai i Klodian Rashës. Protestat e dhunshme nuk do të japin drejtësi për 25-vjeçarin.

Deklaratat e faktorit ndërkombëtar, ambasadorëve i kanë dhënë qartësisht se protestat janë mekanizëm i rëndësishëm për demokracinë por kur kthehen të dhunshme janë të paligjshme. Ato i janë drejtuar partive politike të distancohen nga dhuna në protesta.

Policia do të kryejë punën e tyre. Do të duhet të menaxhojnë situatën që këto protesta të zbehen. Kemi rolin si shoqëri t’u bëjmë thirrje prindërve të të miturve që të kontrollojnë fëmijët e tyre që po përdoren politikisht.

Të gjithë duhet të kemi mundësinë t’u bëjmë thirrje organizatorëve që të shmangin aktet e dhunës. Ne kemi parë eksponentë të partive politike që kanë qenë pjesë e këtyre protestave.

Prokuroria duhet të hetojë se kush qëndron pas protestave të të miturve. Ata nuk e kanë idenë as se çfarë po kryejnë.

Pamjet me figurë e zë dëshmojnë se kanë qenë aktorë politikë të PD-së dhe LSI-së. Nuk besoj që dikush mendon se Voltana Ademi nuk ishte në protestë kur e kemi me zë e figurë. Nuk pres që kryebashkiakja të marrë gurë të godasë në protestë”,– shprehet Gjonaj./K.C/dritare.net