Mesjavë emocionuese në Supersport, dy vëllezërit Inzaghi përballë njëri-tjetrit, spikat edhe Werder-Dortmund!

Në Itali, java e 12-të do të nisë me dy sfida interesante ku spikat më shumë ajo e mbrëmjes mes Beneventos dhe Lazios. Përballë njëri-tjetrit do të jenë dy vëllezërit Filippo Inzaghi nga njëra anë dhe Simone Inzaghi në krahun tjetër. Bardhekaltrit janë favoritë për të triumfuar në këtë ndeshje pasi kanë një skuadër shumë herë më të fortë se Benevento, por Pippo do të kërkojë t’i bëjë një surprizë të hidhur vëllait të tij pasi ashtu si Lazio që ka nevojë për pikë për Kupat e Europës, edhe Benevento dëshiron të marrë maksimumin në këtë ndeshje për t’iu larguar sa më shumë fundit.

Më herët në orën 18:30, Udinese do të tentojë me të gjitha mënyrat të mposhtë Crotonen për të marrë pikë të rëndësishme në garën për mbijetesë. Nëpërmjet kanalit Eurosport 2, këtë të mërkurë në ekranin tonë do të keni mundësi të ndiqni edhe dy duele të javës së 12-të të Bundesligas, pikërisht takimet Frankfurt-Gladbach dhe Werder Bremen-Dortmund, me verdhezinjtë që do të bëjnë çmos për t’u rikthyer te suksesi.