1216 kandidatët e pavarur për president në SHBA, që nuk i njohim

SHBA ka pasur presidentë për më shumë se 230 vjet, por vetëm i pari, George Washington, njihet në histori si një kandidat i pavarur. Kandidatët e dy partive të mëdha, asaj Republikane dhe Demokratike, mbizotërojnë në çdo listë dhe mbulojnë pothuajse të gjitha prodhimet  mediatike me tema politike. Prandaj, shanset që një kanditat i jashtëm të fitojë apo së paku, të njihet në Amerikë, janë pothuajse zero.

Nisur nga ç’ka thamë më lart lind pyetja “Kush do të kandidonte për president kundër Trump apo Biden duke e ditur që fitorja është vetëm një ëndërr?”

E po ja që një listë prej 1,216 kandidatësh për presidentë është krijuar që nga 9 tetori. Duhet përmendur që shumica nuk janë aspak seriozë por gjithsesi emri i tyre është shtuar në listat e Komisionit Federal të Zgjedhjeve.

Në një intervistë për BBC, tre prej këtyre kandidatëve kanë dhënë argumentat dhe arsyet pse duhet të votohen nga qytetarët amerikanë.

Një pianiste dhe njëkohësisht folëse motivuese, një multimiliarder dhe një teknik IT janë protagonistët e intervistës në fjalë.

Amerikanët do të shohin që Biden dhe Trump nuk janë zgjedhja

Jade Simmons, është një nënë, pianiste profesioniste, ish modele dhe një repere. Ajo shprehet se është një kandidate jokonvencionale, “por këto janë kohëra konvencionale”.

“Unë jam vajza e një aktivisti për të drejtat civile dhe ideologjia e babait tim ishte se nëse shihni zbrazëtira, nëse shihni padrejtësi, duhet të pyesni veten nëse mund të jeni ju ai që duhet të mbështeteni.”

Ajo thotë se qëllimi i saj është të krijojë mundësi të barabarta, përmes reformës ekonomike, arsimore dhe drejtësisë penale. Dhe në këtë frymë, ajo po synon të drejtojë “fushatën më pak të kushtueshme në historinë e Amerikës“.

Kujtojmë se kriteret për kandidaturë  janë: mosha mbi 35 vjeç, vendlindja  në SHBA dhe jetesa atje për të paktën 14 vite.

Simmons thotë se një kandidaturë kushton të paktën 1 miliardë dollarë dhe ajo preferon t’i shpenzojë ato para për shtetasit.

Pra, a është ajo liberale apo konservatore?

“Varet nga kush pyet!”, tha ajo. “Të gjithë, që nga vëllezërit e pakënaqur të Bernie deri tek pastorët e krishterë konservatorë po e pëlqejnë politikën tonë”.

Prejardhja e saj si ministre dhe një person me besim të krishterë nuk tregon automatikisht konservatorizmin, thotë ajo. Jade gjithashtu, mbështet fort të drejtat e njerëzve me ngjyrë.

Pandemia e koronavirusit ka përmbysur garën e këtij viti në Shtëpinë e Bardhë duke mbizotëruar titujt e lajmeve. Por për Jade, sfida kryesore e fushatës së saj ka qenë thjesht njohja nga njerëzit.

Ndërsa të nominuarit Republikanë dhe Demokratë do të jenë në votim në të gjitha shtetet, “të pavarurit” duhet të përmbushin një varg kriteresh shtetërore dhe kërkesat e hyrjes.

Emri i zonjës Simmons do të shfaqet në fletët e votimit në Oklahoma dhe Louisiana, por në 31 shtete të tjera ajo është regjistruar si “një kandidate  e pa shkruar”, që do të thotë që nëse votuesit shkruajnë fizikisht emrin e saj në listë, vota e tyre do të llogaritet. Ajo e pranon që shanset janë absolutisht kundër saj, por ende beson se mund ta arrijë në Zyrën Ovale dhe nëse jo këtë vit, atëherë në një moment tjetër.

Kam marrë një vendim për të jetuar jetën time në shërbim të popullit

Një tjetër kandidat për president është edhe Brock Pierce, një ish aktor filmash për fëmijë e tani një miliarder që në zanat është një inxhinier teknologjie i suksesshëm. Ai thotë se arsyeja përse po kandidon lidhet ngushtë me shqetësimet që ai ka për Amerikën dhe problemet e saj si shtet.

“Unë mendoj se na mungon një vizion i vërtetë për të ardhmen, dua të them, në çfarë lloj bote duam të jetojmë, në vitin 2030? Cili është plani? Ku po përpiqemi të arrijmë, e dini? Ju keni për të synuar diçka. Dhe unë shoh kryesisht shumë baltë që hidhet përreth, jo shumë njerëz që hedhin ide për të ndryshuar vendin. Unë besoj te vetja! Unë kam një vizion për të ardhmen“, shtoi ai.

Për katër vitet e fundit, z.Pierce është përqendruar në punën filantropike në Porto Riko, ku fondacioni i tij mblodhi një milion dollarë për veshje anticovid.

I pyetur se cilat duhet të jenë përparësitë e Amerikës për katër vitet e ardhshme, ai sugjeron që vendi të ndalojë së  ndjekuri ideologji të pabaza dhe produktive. Pierce mat suksesin e tij me sa rëndësi i kushton jetës, lirisë dhe lumturisë.

“Unë kam shumë tendenca liberale, ashtu si kam tendenca konservatore”, thotë z. Pierce. “Dhe unë mendoj se është koha që të bëjmë një frymë kolektive dhe një hap të guximshëm drejt së ardhmes, sepse të gjitha këto ideologji kanë diçka për të na mësuar”.

Jeta e 39-vjeçarit nuk ka qenë aq e paqartë. Kur ishte 19 vjeç, tre aktorë meshkuj e akuzuan atë dhe dy partnerë biznesi për sulme seksuale. Pierce mohoi çdo akuzë dhe nuk pati kurrë një tjetër dosje penale. Të tre paditësit tërhoqën çështjet e tyre kundër tij dhe kurrë nuk morën ndonjë dëmshpërblim personal. Por në mënyrë të pashmangshme, titujt kryesorë të këtij episodi e kanë bërë një zgjedhje presidenciale të kritikuar.

“Ne duhet të ndryshojmë themelet e këtij kombi”

Një e përbashkët e këtyre kandidatëve është se atyre  nuk u  duhet  të kënaqin një shumicë partie për të marrë një shumicë votash kështu që ata kandidojnë dhe flasin për çështje që i përfaqësojnë individualisht.

Mark Charles është një shembull kryesor.

Profesionalisht ai ka punuar si një programues kompjuteri, por ai është gjithashtu një aktivist i zjarrtë i drejtësisë sociale për çështje që prekin amerikanët vendas dhe njerëzit me ngjyrë.

Qëllimi i tij është të jetë një kandidat alternativ për votuesit të cilët nuk ndjehen të përfaqësuar  nga Trump ose Biden.

Charles është nga Navajo, një provinë e vogël e pavarur në jug të Amerikës.

“Ne ishim gjashtë milje larg rrugës më të afërt të asfaltuar, jetonim në një dhomë Hogan – banesa tradicionale Navajo. Në komunitetin tonë nuk kishte ujë të rrjedhshëm, pa energji elektrike, fqinjët tanë ishin endës qilimash dhe barinj“.

“Kushtetuta jonë, e cila fillon me fjalët” Ne njerëzit “[…] nuk përmend kurrë gratë, në mënyrë specifike përjashton vendasit dhe numëron Afrikanët si tre të pestat e një personi”, thotë z. Charles.

“Dhe këtë do të arrijë fushata ime: nëse duam të jemi një komb ku “njerëzit” do të thotë me të vërtetë të gjithë njerëzit, ne duhet të bëjmë një punë të nivelit themelor. Ne nuk mund ta themi atë dhe të dëshirojmë të ishte kështu: ne duhet të ndryshojmë disa gjëra mbi të cilat ky komb u themelua, të tilla si racizmi, seksizmi dhe epërsia e qartë e bardhë “./BBC/Mapo/