VV denoncon fjalimin e presidentit Donald Trump për Kosovën dhe Serbinë

Lëvizja Vetëvendosje përmes një deklarate në Facebook ka denoncuar një pjesë të fjalimit të presidentit Donald Trump si “rehabilitues të kriminelëve të luftës”. 

Presidenti Trump në një event të fushatës së tij presidenciale për të fituar një mandat të dytë deklaroi se “ShBA-ja kishte parandaluar vrasje masive mes Kosovës dhe Serbisë”.

Kjo deklaratë po shihet si problematike nga ana e Vetëvendosjes, subjekt politik ky që ka paralajmëruar se nëse vjen në pushtet nuk do ta respektojë e zbatojë Marrëveshjen e Washingtonit të arritur më 4 shtator, shkruan Periskopi.

“Ndërsa Kosova, e cila ka partner të vetëm gjeopolitik perëndimin, ShBA e NATO, ka një ushtri minimale, nuk ka as armatim të rëndë e as buxhet të mjaftueshëm. Si mund ta rrezikojë Kosova e varfër dhe e çarmatosur Serbinë?” – shkruan Vetëvendosje.

Vetëvendosje thotë se paqja vendoset kur Serbia e njeh Pavarësinë e Kosovës ndërkohë që denoncon (sic) “rehabilitimin e ish bashkëpunëtorëve të Millosheviqit”.

Deklarata e plotë: 

Dje dëgjuam presidentin e ShBA-ve të flasë në një tubim elektoral për “ndalje të vrasjeve masive mes Kosovës dhe Serbisë”, që paskan bërë krime të tilla kundër njëra-tjetrës, “për shekuj me radhë”.

Besimi se lufta e Kosovës e ka themelin te urrejtjet e lashta etnike, e te mospërputhja esenciale mes popullit serb e shqiptar, është besim i gabueshëm, i cili injoron rolin kryesor të Milosheviqit dhe regjimit të tij në shkaktimin e luftës. Po ashtu, ky besim anashkalon faktin se lufta nuk u urdhërua e nuk u organizua “prej qytetarëve”, por prej ushtrive e policive, me hierarki e përgjegjësi të qartë komanduese. Këtë temë e shtjellon historiani Noel Malcolm, “Kosova – Një histori e shkurtër”, i cili tash e dy dekada është bërë lektyrë për ushtarakët e KFOR-it, pra edhe ata amerikanë, të stacionuar në Kosovë, dhe mendojmë se duhet të lexohet edhe prej diplomatëve e këshilltarëve të presidentit që merren me çështjen e Kosovës e atë të Serbisë. Nëse lufta në Kosovë do të kishte qenë e karakterit etnik, pra dallimi etnik na paska shkaktuar konfliktin, atëherë kurrë nuk do të intervenonte NATO dhe Milosheviqi nuk do të mund të konsiderohej përgjegjës prej vetë ShBA-ve, NATO-s, OKB-së, e vendeve kryesore demokratike të botës. E vërteta është që prapa krimeve e masakrave qëndronte një aparat shtetëror gjenocidal (i cili më herët kishte sulmuar në Slloveni, Kroaci dhe Bosnje e Hercegovinë), kurse në anën tjetër populli shqiptar i pambrojtur në Kosovë, që u vetëmbrojt. NATO nuk mund të qëndronte duarkryq teksa Srebrenica po përsëritej në Kosovë.