Pas njoftimit për kufizimin e kohëzgjatjes së vizave për studentë kosovarë, SHBA del me sqarim shtesë

Këshilltari politik në Këshillin Amerikan për Emigracion, Aaron Reichlin-Melnick, ka folur rreth vizave të studentëve në SHBA.

Ai me anë të një postimi në rrjetin social Twitter ka shkruar se studentët nga disa shtete të botës do ta kenë të limituar vetëm deri në dy vjet marrjen e vizave për në SHBA.

“Në propozimin e ri të Departamentit të Sigurisë së Brendshme, nëse keni lindur apo jeni qytetar i njërit prej këtyre vendeve në këtë hartë, nuk do të mund të merrni vizë katër vjeçare në SHBA, ndërsa viza e studentëve limitohet maksimumi deri në dy vjet”.

Pas këtij postimi ka reaguar deputetja Mimoza Kusari-Lila, e cila ka thënë se është lëshuar njoftimi nga Departamenti Amerikan për Siguri Kombëtare se është vendosur kufizim i kohës për të cilën mund të aplikojnë studentët nga Kosova për vizë Amerikane.

“Kosova është në mesin e shteteve nga Afrika dhe Azia e cila është vlerësuar se shtetasit e saj e tejkalojnë kohën e qëndrimit të tyre përtej afatit të vizës valide në SHBA. Andaj Administrata e Presidentit Trump që nga viti i kaluar ka filluar përgatitjen e një kufizimi më të ashpër për këto shtete”.

“Njoftimi zyrtar u publikua sot, ndërsa duket se ka qenë i përgatitur para 4 Shtatorit, por ja që delegacioni i Kosovës në SHBA “nuk ka pasë mundësi” ta adresojë si duhet se ishin duke e nënshkru Ujmanin dhe mini Schengenin”.

“Por nuk lidhje, janë mësuar Kosovarët me apliku dhe ri-apliku për viza, me rëndësi fotot e mira i kemi. Normalizim se jo mahi!”, ka shkruar Kusari-Lila në rrjetin social Facebook.

Reichlin-Melnick më vonë është sqaruar në një cicërimë tjetër duke thënë se ” Kjo është një nga ato cicërimat që u bë virale papritur, dhe natyrisht pasi e postova e kuptova që aksidentalisht e bëra atë të tingëllojë shumë më keq duke mos cekur mundësinë e zgjatjes së statusit, i cili do të ishte i lejuar edhe pas dy vjetësh. Nuk duhet të kisha thënë ndalim”.