Dedaj i pandalshëm, Kreuzlingeni i tre reprezentuesve tanë shënon fitoren e tretë

Kreuzlingeni e fitoi këtë ndeshje të Ligës B të Zvicrës me rezultat 27:25. Ishte ndeshje e fortë që në fakt u vendos nga Dedaj.

Këtë e kanë pranuar edhe në klubin kundërshtar. Te Horgeni kanë thënë se lojtarët e këtij ekipi nuk ia kanë dalë të kontrollojnë kapitenin e Kosovës. Qendra Dedaj ka shënuar në pjesën e dytë gjashtë gola, kurse ka organizuar lojën në mënyrë të shkëlqyeshme.

Gjithsej i realizoi tetë gola prej 12 tentimeve. Realizoi po ashtu dy prej tri penalltive.

“Për fat të keq nuk kemi mundur të kontrollojmë qendrën e tyre në pjesën e dytë”, ka thënë kapiteni i Horgenit, Dani Gantner.

Kreuzlingeni ka shënuar fitoren e tretë në ndeshjen e tretë dhe po marshon drejt Superligës. Dedaj në tri ndeshje i ka realizuar 21 gola.

Te Kreuzlingeni janë edhe dy reprezentues të Kosovës, Drenit Tahirukaj e Haris Berisha. Tahirukaj realizoi një gol kurse Berisha kishte katër pritje. Por portieri Berisha nuk u aktivizua shumë për shkak se gjatë javës ishte me grip. Nuk ka stërvitur prej të hënës deri të enjten.

Të tre lojtarët tanë janë shumë të rëndësishëm te Kreuzlingeni. /Lajmi.net/