PD: Bizneset shqiptare ikin nga Shqipëria dhe investojnë në Maqedoninë e Veriut

Ish-deputetja e Partisë Demokratike, Jorida Tabaku, në rrjetin social Facebook, shkruan se klima e biznesit në Shqipëri është mbytëse dhe se bizneset shqiptare zgjedhin të investojnë në Maqedoninë e Veriut.

Tabaku thekson se bizneset shqiptare jashtë Shqipërisë kanë investuar 1.3 miliardë euro dhe se shumica e investimeve është në Maqedoninë e Veriut.

“Bizneset shqiptare kanë investuar jashtë Shqipërisë 1.3 mld euro dhe shumica kanë shkuar në fqinjin tonë Maqedonisë së Veriut. Jo vetëm nuk tërheqim investime të huaja por as nuk bindim bizneset vendase të investojnë në Shqipëri. Mijëra vende të reja pune në RMV prej investimeve te biznesit shqiptar, ndërkohë që rradhët e të papunëve në Shqipëri shtohen përditë”, shkruan ish-deputetja e PD-së, Jorida Tabaku.

Për ikjen e investitorëve nga Shqipëria dhe aderrimin në vendin tonë Tabaku ia hedh fajin politikës së keqe të kryeministrit Rama. Sipas saj Qeveria Rama ka shpërdoruar dhe vjedhur me PPP-të korruptive një vlerë sa 13% e Prodhimit të Brendshëm, afërsisht sa investimet e humbura në Shqipëri.

“Në vend të ndihmës për ekonominë, Qeveria Rama ka shpërdoruar dhe vjedhur me PPP-të korruptive një vlerë sa 13% e Prodhimit të Brendshëm, afërsisht sa investimet e humbura në Shqipëri. Këto miliarda euro dhe mijëra vende pune të humbura për shqiptarët, fqinji ynë na i ka marrë si pasojë e politikave fiskale dhe ekonomike pro-biznes. Vetëm për 2019 vlera që kemi humbur ka qenë sa 10% e PBB-së”, shkruan më tej Jorida Tabaku.

.