Lutfi Haziri viziton QKMF-në, konfirmon mbështetje për përballimin e pandemisë

Kryetari i Komunës së Gjilanit, Lutfi Haziri, ka vizituar sot Qendrën Kryesore të Mjeksisë Familjare për t’i uruar detyrën e re drejtoreshës Arbenita Hajdari .

”Besoj shumë në profesionalizmin e drejtoreshës dhe të stafit të QKMF-së në përgjithësi, por e nevojshme është mbështetja e disa projekteve që do ta bënte edhe më të lehtë punën gjatë të ardhmes”.

Ai shkruan se nuk do të vonojë gjatë kohë, edhe transferimi i stafit në spitalin e ri, njofton Klan Kosova.

”Shumë shpejtë do të fillojë bartja e stafit në Spitalin e ri, një objekt modern që po shkon drejt finalizimit, ku do të pajisen edhe me mjete moderne të punës, në mënyrë që angazhimet të jenë në funksion të punës dhe rritjes së efikasitetit ndaj pacientëve”.

”Në këtë fazë ka shumë detyra dhe obligime që duhet të menaxhohen në mënyrën më të mirë të mundshme, sepse është fillimi i vitit shkollor, janë vaksinimet, përballja me pandeminë dhe detyra të tjera që lidhen direkt me këtë Qendër”, ka thënë Haziri.

Arbenita Hajdari, drejtoreshë e QKMF-së e ka falënderuar kryetarin Haziri për vizitën e bërë në këtë qendër.

”Mbështetja dhe bashkëpunimi i ofruar nga kryetari Haziri janë një nxitje edhe më e madhe për të gjithë ne, që të punojmë edhe më shumë në shërbim të qytetarëve në përgjithësi dhe pacientëve edhe përkundër që jemi në një kohë të vështirë të përballjes me pandeminë globale”, është deklaruar ajo.