Hoti bisedon në telefon me Stoltenbergun, ky i fundit ia përmend dialogun dhe marrëveshjen me Serbinë

Kjo u bë e ditur me anë të një komunikate për media nga zyra e kryeministrit.

Me këtë rast, kryeministri Hoti vlerësoi edhe punën e Ekipit Këshillues dhe Ndërlidhës të NATO-s (NALT), që po jep ndihmesë të rëndësishme për avancimin e institucioneve të sigurisë së Kosovës.

Kryeministri Hoti e ka vlerësuar edhe ndihmën e KFOR-it për menaxhimin e pandemisë COVID-19.

Po ashtu, kryeministri Hoti theksoi se Republika e Kosovës është e përkushtuar ta ndërtojë të ardhmen e saj euroatlantike dhe të bëhet sa më parë pjesë e NATO-s dhe e institucioneve të tjera ndërkombëtare.

“Ndërsa, Sekretari Stoltenberg e siguroi kryeministrin Hoti se NATO-ja do të vazhdojë të bashkëpunojë ngushtë me institucionet e Kosovës për të siguruar një mjedis paqësor dhe një të ardhme të sigurt për të gjithë qytetarët e saj dhe të rajonit, si dhe mbështetjen për procesin e dialogut me Serbinë si mënyrë e vetme për të siguruar zgjidhje politike afatgjate”, thuhet në komunikatë për media.

Ndërkohë, zyra e kryeministrit nuk bëri të ditur nëse temë diskutimi ishte edhe rasti i hyrjes së xhandarmërisë serbe në territorin e Kosovës, ngjarje kjo që shkaktoi bujë të madhe në opinion dhe në skenën politike.