Edi Rama kujton Bajram Rexhepin: Kam pasë nderin ta njoh atë zotni të madh e të urtë

Kryeministrit i Shqipërisë, Edi Rama, ka kujtuar në tre vjetorin e vdekjes ish-kryeministrin e parë të Kosovës, Bajram Rexhepin, transmeton Klan Kosova.

Rama ka deklaruar se ka pasur fatin dhe nderin ta njoh Rexhepin, i cili sipas tij i shërbeu Kosovës në luftë e në paqe, me humanizmin shembullor dhe modestinë e admirueshme të një mjeku punë shumë e fjalëpakë.

“BAJRAM REXHEPI, e përjetoi dhimbjen e plagëve të luftës çlirimtare, si mjeku i UÇK-së që u shërbeu çlirimtarëve të plagosur, duke kryer deri edhe ndërhyrje të rënda kirurgjikale e shpëtuar jetë larg sallës së operacionit, nëpër malet e rezistencës për liri. Ai u bë kryeministri i parë e i gjithëpranuar i Kosovës, me mbështetjen e krejt forcave politike, kur dukej se askush s’mund ta merrte konsensusin e tyre dhe ishte i pari zyrtar i lartë i Kosovës së lirë, që shkeli në Mitrovicën e dasisë së madhe, vendlindjen e tij, duke u bërë garanti i sigurisë për të gjithë atje, kur pas mbytjes së dy fëmijve shqiptarë në ujrat e Mitrovicës, valvula e tensionit ndëretnik ishte në një moment shpërthyes”, ka shkruar Rama në rrjetin social Facebook.