Pesë, tre a dy? Informacione kontradiktore për të vdekurit në Gjakovë nga Covid-19

Deputeti i Lëvizjes Vetëvendosje, Agon Batusha sot dha alarmin se pesë persona kanë vdekur për  dy orë në Spitalin e Gjakovës të infektuar me koronavirus.

Këtë deklaratë, Batusha e dha përmes një shkrimi në rrjetin social Facebook, megjithatë, të njejtin nuk e kanë konfirmuar ende në Spitalin e Gjakovës.

Të kontaktuar nga Express, nga Spitali nuk janë përgjigjur në pyetjen e Gazetës.

Megjithatë, se kanë vdekur pesë persona për dy orë e kanë mohuar në Komunën e Gjakovës.

Kryetari i kësaj komune, Ardian Gjini ka thënë se deri më tani e ka informacionin për vdekjen e tre personave që ishin të prekur me koronavirus.

“Këtë informacion nuk e kam, për tre e kam informacionin për dy gra të moshuara dhe doktorin. Mirëpo, jam në mbledhje të asamblesë momentalisht dhe nuk e di ndërkohë nëse ka pas ndonjë rast të ri të vdekjes”, ka thënë ai.

Ndryshe është deklaruar drejtori i Shëndetësisë në Gjakovë, Ferdinand Kolaj.

Ai ka thënë  se deri më tani ka informacione se kanë vdekur dy persona.

“Nuk është e veretë që sot kanë ndodhur pesë vdekje në Spitalin e Gjakovës. Mua më konfirmuar për dy vdekje, për pesë nuk është e vërtetë”, tha Kolaj.