Hoti falenderon “mbylljen e xhamive”: Gjendje e rëndë

Kryeministri i Kosovës Avdullah Hoti, në një urim për Kurban Bajram me xhami të mbyllura, falenderoi qytetarët që sipas tij kanë respektuar masat dhe apelin e qeverisë që të mos i vizitojnë objektet fetare, në këtë rast xhamitë.

“Unë sot i falendëroj të gjithë qytetarët që po i respektojnë masat për këtë ditë feste. Duket që apeli që kemi bërë si qeveri, bashkë me të gjitha institucionet dhe aktorët tjerë të përfshirë në menaxhimin e kësaj situate, ka dhënë efekt. Shpresoj që kjo të vazhdojë dhe njerëzit t’i respektojnë masat dhe të jenë të vetëdijshëm, sepse vetëm kështu mund ta menaxhojmë këtë situatë”, tha Hoti.

Ai i bëri këto komente gjatë vizitës në Qendrën Klinike Universitare të Kosovës (QKUK), ku falënderoi edhe stafin për punën që bën dhe tha se përballja me pandeminë “është mision kombëtar”.

“E di që janë lodhur, sepse tash e gjashtë muaj po përballen me këtë situatë. Unë jam sot këtu për të treguar vlerësimin tonë për punën që po bëjnë dhe për të dëgjuar vlerësimet e tyre për situatën nëpër të cilën po kalojmë, parashikimet për javët dhe për muajt e ardhshëm dhe përgatitjet që ne duhet t’i bëjmë në këtë drejtim. Gjendja është e rëndë”, tha Hoti.

Bashkësia Islame e Kosovës ka marrë vendim të enjten që Kurban Bajrami të mos falet në xhami, për të frenuar, siç është thënë, përhpajen e koronavirusit.

Edhe me masat e reja të miratuara nga qeveria e Kosovës, “pjesëmarrja fizike e qytetarëve në të gjitha ceremonitë dhe veprimtaritë fetare në Kosovë” është e ndaluar.

.