Shuhet shpresa e BDI-së, Lazim Destani: Nuk futem në politikë!

Biznesmeni i njohur dhe filantropi, Lazim Destani në prag të zgjedhjeve Parlamentare që mbahen më 15 korrik u ka uruar gjithë subjekteve politike një fushatë dinjitoze dhe zgjedhje korrekte e demokratike.

Përmes këtij statusi Destani ka shuar shpresën e BDI-së që synonte të nxjerr kandidatë për kryeministër.

“Në prag të zgjedhjeve parlamentare në Republikën e Maqedonisë së Veriut, të gjitha subjekteve garuese jua përcjell urimet e mia për fushatë dinjitoze dhe zgjedhje korrekte e demokratike. Me këtë rast, meqenëse ditët e fundit në media po përmendet emri im si kandidat për pozitën e Kryeministrit, dua të sqaroj gjithë opinionin se ashtu siç kam deklaruar edhe në të kaluarën, krahas biznesit unë mbetem i përkushtuar në sferën e filantropisë si dhe tek aktivitetet e mia në strukturat drejtuese të diasporës sonë. Angazhimi në jetën politike nuk ka qenë dhe nuk është në planet dhe ambicjet e mia. Kontributi im mbetet në sferën e zhvillimit ekonomik përmes sipërmarrjeve në biznes ashtu siç kam bërë gjatë gjithë karrierës sime.Uroj nga këto zgjedhje të dalë një qeveri që t’i shërbejë më së miri vendit dhe gjithë qytetarëve”, ka shkruar Lazim Destani në Fejsbuk.