Përkundër thirrjes për izolim, fëmijët mblidhen nga çerdhja në Prishtinë edhe pse kishin kontakt me të dyshuarit për koronavirus

Dy klasë të çerdhes “Xixëllonjat” në Prishtinë u raportua javën e kaluar se kishin pasur kontakt me një edukatore të dyshuar për koronavirus, plus fëmijët e saj. Dje prindër të shqetësuar i kanë shkruar Periskopit duke thënë se çerdhja do ta mbante një event edhe pse periudha e izolimit nuk kishte kaluar. 

Thirrjen për izolimin katërmbëdhjetë (14) ditor e kishte bërë edhe vetë kryetari i komunës së Prishtinë, z.Shpend Ahmeti. Por, duket qartë se kjo kërkesë nuk është përfillur nga drejtuesit e çerdhes dhe edukatoret e saj.

Sot, më 15 qershor, u mbajt eventi madje edhe nga klasët që kishin pasur kontakt dhe duhej të rrinin në izolimin katërmbëdhjetë ditor.

Një gjë e tillë është kërkesë e Organizatës Botërore të Shëndetësisë (OBSh). Megjithëse edukatorja doli negative në testimin e parë, ajo duhet testuar sërish, pasi siç ka ndodhur shpesh rezultati i testimit dallon nga hera e parë në të dytën, shkruan Periskopi.

Por, megjithëse ende edukatorja në fjalë që kishte pasur kontakt me dy klasë të çerdhes nuk ka kaluar periudhën izoluese katërmbëdhjetë ditëshe, eventi u mbajt.

Për më keq, fëmijët mund të shihen fare pranë njëri-tjetrit duke mos respektuar distancën sociale 2 metërshe me njëri-tjetrin në mënyrë që të reduktojnë mundësinë e infektimit me Covid-19.

Rekomandimet e OBSh-së bazohen në studime kredibile shkencore, dhe të tillat i ka shpërndarë edhe Instituti Kombëtar i Shëndetit Publik (IKShP) në Kosovë. /Periskopi