Nesër rihapet çerdhja ‘Xixëllonjat’ në Prishtinë

Çerdhja “Xixëllonjat” në Prishtinë do të rifillojë punën ditën e nesërme. Kjo për faktin se edukatorja e dyshuar si e infektuar me Covid-19 doli negative në testimin për koronavirus.

Lajmin për rihapjen e çerdhes e ka dhënë i pari i Prishtinës, Shpend Ahmeti.

Sipas tij, çerdhja do të vazhdojë punën derisa edukatorja do të vetizolohet për 14 ditë. Dyshimet për infektimin e edukatores erdhën pasi bashkëshorti i saj doli pozitiv në infeksion.

“Edukatorja e çerdhes Xixëllonjat ka rezultuar negativ në testimin për Covid, kështu që çerdhja rifillon punën nesër. Edukatorja do të jetë në vetëizolim për 14 ditë. Falemnderit!”, shkroi Ahmeti në Facebook.

Në Kosovë gjatë ditës së martë janë regjistruar gjashtë raste të reja me Covid-19, sëmundjen që e shkakton koronavirusi.

Sipas të dhënave të fundit, në Kosovë, që prej shfaqjes së rasteve të para me koronavirus më 13 mars, janë regjistruar 1,269 raste dhe 31 pacientë kanë vdekur. 912 pacientë janë shëruar.